Na ka ‘On PWD Duty’ lap ki RBYF bad FKJGP, ia ki bym biang kot bad kiba thmu rung tuh sha ka jylla

Nongpoh:Mynhynnin ka miet, ki dkhot ka RBYF bad ka FKJGP Umsning Circle ki la ioh ban bat ia kumba 9 ngut ki bar jylla, kiba la thmu ban rungtuh sha ka jylla khlem da biang ia ki kot ki sla kiba biang.

Ia kitei ki bar jylla, la ioh ban bat ha ki bynta ka Umsning bad ka jingiohbat da kitei dkhot ka sengi a kitei ki bar jylla, ka dei hadien ba ki la ioh jingtip ba la don ki briew nabar jylla kiba la thmu ban rungtuh sha ka jylla, kumta haba ki dkhot jong kitei ki seng ki la ap ha Umsning, ki la ioh ban bat ia kitei ki bar jylla, kiba la wan lyngba ka Kali Tata Mobile kaba don ïa u number AS-11-EC-0412, kaba dei ruh ruh ka kali kaba la thoh ‘ ON PWD Duty’.

Haba shimkhia ia ka jingtip ba kitei ki seng ki la ioh, ki la bat noh ia katei ka kali bad hadien kata ki la lap ia kitei ki 9 ngut kiba la rieh bha ialade hapoh katei ka kali da kaba kah ïa lade da ki kynja kor ba pyndonkam ha kaba siang rong ïa ka surok.
Hadien ba la iohbat ia kitei ki bar jylla, na ka liang ki nongialam jong kitei ki seng, ki la leit ban aiti noh sha ki bor pulit ka Umsning Police Outpost, khnang ba ki ioh ban tohkit bad ban leh ia kaba donkam kiba iadei katkum ki kyndon ain.

Haba iadei bad katei ka jingjia, u Bah Balakmen Nongbri, President ka RBYF RBYF Umsning Circle lem lem bad u samla Steve Wahlang, General Secretary ka FKJGP, Umsning Circle, ki la ong ha ka jingshisha kum ki nongïalam ka seng kim don kata ka jingthmu ban khang ïa kino kino kiba wan bar jylla kiba wan bylla sha kane ka jylla, hynrei ki dei pat ban burom da kaba pynbiang ïa ki kot ki sla ha kaba kumba la lap da ka seng kitei ki bar jylla kim don satia ïa ki kot ki sla bad wat ha Infiltration check gate Byrnihat ruh ki la shu rung tuh da kaba rieh hapho katei ka Kali ban kah da ki kor ki bor ba pyndonkam ha kaba siang rong ïa ka surok.

Ka jingkren na kitei ki nongialam seng, ki la kyntu jur ia ki tnad treikam sorkar bapher bapher bad ruh wat ki Contractor ruh ki hap ban pyrkhat lem ia ka jylla bad lada ki kwah ban wanrah ia ki nongtrei na shabar ka jylla ki dei ban pynbiang ia ki kot ki sla, namar ka jingiohrung laitluit ki briew nabar ka buh jingma eh ia ka jylla bad ia ka jaidbynriew hi baroh kawei.