Shillong: U Chief Executive Member ka KHADC u bah H.S Shylla u la iathuh ba don ki shnong kiba kylli ia u shaphang ka jingthoh kaba ki ioh na C&RD Block na ka bynta ban thaw ia ka Gram Sabha Committee na ka bynta ban pyntreikam ia ka My Village My Development Plan kaba dei ka skhim jong ka sorkar India.
U bah Shylla u la ong ba ka hukum jong ka sorkar India ban thaw da katei ka komiti ka dei kaba buh jingma ia ki shnong ha ri Khasi-Jaintia, “Ngi sngewthuh shai ba ka dei ka jingthmu ban wanrah da ka Panchayat, ka la dei beit ka jingring ksai ban wanrah Panchayat ( In direct) ha ki shnong jong ngi, kane ka jingleh ka sorkar ka dei kaba ma bha” ong u bah Shylla.
U CEM u la ong ruh ba ka sorkar India ka pyrshang katba lah ban pynhap ia kane ka jylla hapoh ka Panchayat, “Ka MNREGS ka dei kawei na ki ajenda ba ka sorkar India ka la pyrshang da kaba pyndonkam da ka 11th Schedule hynrei ka jingmih jong kane ka dei ka dak kaba shai bha ba ka sorkar India ka la kwah eh ban wanrah da ka Panchayat hangne” ong biang u bah Shylla. U la iathuh ba katkum ki kyndon jong katei la ong ba uno uno u rangbah briew u dei ban long u dkhot khlem da kdew u trai muluk ne u bar jylla ruh.
Shuh shuh u bah Shylla u la ong ba ka sorkar India ka la pyrshang ban pynklet da kaba wanrah ha ka dur ki kam pynroi bad da kaba theh da ki scheme, ” La pyrshang ban thombor ia ki briew jong ngi da ka pisa lyngba ki skhim bad ki kam pynroi, ha ka jingshisha ym pat lah ban pyntreikam ia kane lada khlem ioh ia ka rain a ka ing dorbar Thaw-aiñ, ngin wad ban dang lum jingtip bha shaphang kane bad ngin hap ban shong ia ka Executive Committee bad lada donkam ngin khot ruh da ka dorbar kyrpang ban shim ia ka rai bad ban ieng pyrshah, ngi sngewthuh lada ka long kumne ka District Council ruh kan sa duh noh” ong u bah H.S Shylla ha ka jingiakren bad ki nongthohkhubor.