Na ka leit iathoh, ioh pang khlam 95ngut bad iap u nong iathoh ha Bihar, ka lok pat kam lei lei

Ka jing iateh sai iong sai saw, ka pynpoi pynban sha ka jing ia khlad jynduh bad katei ka dei ha ka nongbah Patna, ha kaba u nong iathoh, ula iap noh, tang mar shu dep iathoh.

Ha katei ka jing iathoh, ki don 90 ngut kiba ioh pang khlam coronavirus bad nangta sa u nong iathoh, uba don 30 snem ka rta, uba dei u software engineer, uba trei ha Gurugram, ula iap noh, tang ar sngi, mar ia dep iathoh.

Mar ia iap, utei u nong ia thoh, ki bor district ha Patna, ki leit sha ka shnong Paliganj, kaba don 50 kilometre na Patna, ha kaba la test ia kitei kiba ha iing ba marjan bad la lap ba 15ngut na kitei kiba leit ha katei ka jing iathoh, ha ka 15tarik Jylliew 2020, ki ioh ia katei ka jingpang khlam.

Mar kumta, ki bor distrik, ki la wad jingtip shuh shuh bad hadien ka jing lum jingtip ia baroh kito kiba leit ha katei ka jing ia thoh, la lap ba ki don sa 80 ngut kiba ioh ia katei ka khlam bad kaba dei ka sien nyngkong, ba kan don ka jing ia bit jingpang haduh 95 ngut na kawei ka jaka.

Ki bor pyniaid distrik ha Patna, kim shym la ioh ban test ia utei u nong iathoh, uba la iap, namar ba la tep noh ia ka met jongu, khlem da iathuh satia ia ki bor sorkar.

Ka khubor pulit, ka iathuh ba utei u briew, u dei uba 30 snem ka rta bad u leit sha ka shnong jongu ha Deehpali, ha ka 12tarik Jymmang 2020 bad ka dei ha katei ka por, ba u sdang ban ioh pang Covid-19, hynrei kiba ha iing, ki iaid shakhmat ban pyndep ia ka jing ia poi kha jongu. Ar sngi hadien ka jing iathoh, ka jingpang, ka la nang jur tyngeh bad la ialam mar mar sha AIIMS, Patna, ha kaba ula iap noh.

Ki bor distrik, ki la test ia kiba leit sha katei ka jing iathoh bad ki don 95 ngut kiba ia bit ia katei ka jingpang, hynrei, kaba lyngngoh ka long ba ka nong iathoh pat, kam bit jingpang eiei satia.

Ki bor distrik, ki kynnoh ba kitei ki nong ia thoh, ki la pynkhein ia ki kyndon jong ka sorkar, da kaba ki la khot sngewbha ia palat 50 ngut ki briew.