Na ka khubor pynjah burom, dawa pan map U MLA hapoh 48 kynta

Nongstoiñ, 16 Jymmang:
U MLA ka Nongstoiñ Konstitwensi u bah D. Jyndiang, u la pynpaw ia ka jingsngew sih kaba jur halor ka jingshah kynthoh kaba la ktah mationg ia ka jingsngew shimet ka jong u kum u MLA, kumba ka la paw ha kawei ka kot khubor (ym ha U Rupang), mynta ka sngi.
Kumta ha kaba iadei bad katei ka bynta na ka liang jong u MLA u la dawa ia kiba pynmih ia katei ka khubor lane ia u nongthoh ba ki dei ban pan map na u tei u MLA hapoh 48 kynta bad lada kim pynsngap na ka liang jong u tei u MLA u la ong ba um banse ban hap iaid da kiwei pat ki lad kata da kaba un ai syndon da ka notis bad ban rah ruh shaduh ka Previlege Committee jong ka Assembly.
Ha ka ka jingiakynduh lang bad ki lad pathai khubor jong ka District mynta ka janmiet jong ka sngi ba ar jong ka taiew u bah Jyndiang u la ong “Kumba ka la paw ha ka kot khubor, kaba la mih mynta ka sngi, ka la don ka jingthoh kala pynjah burom ia nga ha kana ka la ktah mationg ia ka jingsngew shimet jong nga kum u MLA, namar ba kumba la thoh ha katei ka kot khubor kam da thew shuh ia ka kam jong ka Party hynrei kala thew beit ia nga shimet”.