Na ka Khristmas, 23 tarik yn rakhe Good Governnace Day

Shillong, 11 Nohprah:
U Nongaiktien ka BJP u Gopal Krishna Agarwal u la ong ba ka BJP Meghalaya kan rakhe ia ka Good Governance Day ha ka 23 tarik, ha jaka ka 25 tarik kaba dei ka sngi Khristmas.
Haba kren sha ki nongthoh khubor ha kane ka sngi Saitjain, u Agarwal u la ong, “Ka BJP ka burom ia ka jingsngew jong baroh ki jait niam bad ha kane ka jylla Meghalaya kaba dei ka jylla ba bun ki Khristan, ka BJP ka la pynbeit ban rakhe iaka Good Governance Day ha ka 23 tarik, ym ha ka 25 tarik”.
Ia ka Good Governance Day la pynbeit da ka sorkar ban rakhe ha ka 25 tarik kaba dei ka sngi kha jong u myntri rangbahduh barim ka ri u AB Vajpayee.
Kham mynshwa, na ka liang ki nongialam balang ruh ki la pynpaw ba kim sngew iahap ban rakhe ia ka Good Governance Day ha ka 25 tarik namar ba ka dei ka sngi ba kyrpang tam jong ki riew ngeit Khristan.