Na ka kali auto, pynkylla u samla sha ka jeep ha Khliehumrnong

Shillong:Ka sap ka phong ka dei kaba ai kyrpang u Blei ia uno uno u briew ha kano kano ka bynta bad kane ka sap ka la paw ha uwei u samla na shnong Khliehumrnong, kaba jngai 7km na Umsning ka Ri-Bhoi district.

U bah Wanbordlang Kharbudnah uba 24 snem ka rta, u dei u samla uba don ka sap ha ka kam shna kali khlem da ioh ia kano kano ka jinghikai, hynrei u tip kumno ban pynwandur, hynrei namar ba um don ki tiar nalade u leit sha jaka welding ban pyndait ban pynbit pynbiang ia ka kali Auto lai kjat ban pynkylla sha ka dur jong ka Jeep.
La ioh ban iakren bad u bah Wanbordlang ban tip khambha ia kane ka sap jong u naduh ba u dang kham khynnah haduh mynta.

Kumjuh ka kmie jongu, ka kong Bipulsha Kharbudnah ka la iathuh ba naduh ba u dang dap 15 snem ka rta u ieid bha ban shna kali da ki dieng, ki kali ball bearing bad kum ka kmie kam ju pyndik than ia u, bad ka la iathuh ba um ju pynlut por ban ialehkai bad ki khynnah hynrei u dem beit khuit ha la kam lajong wat haduh da miet ruh.
Kaba donkam ka long ba ka sorkar ne ka bor ba dei peit ka la dei ban pynshlur ia ki briew kiba donsap, kiba shem buit thymmai kaba pynmyntoi ia ka imlang sahlang ia ki briew.

“Nga la mut dur hi ban shna ia kane ka auto ha ka dur ka jeep ba kwah ban pynneh pynsah ia ka kali rim”, la ong u bah Wanborlang.
U la iathuh ba u la don ka jingsngew tynnad ha ka kam shna kali naduh kham khynnah bad ha ka por khynnah u ju shna kali ball bearing. “Nga naduh kham khynnah nga sngew tynnad ban shna kali kit dieng, kali ball bearing, bad haduh mynta nga sngew tynnad ban pynkylla dur ia ka kali”, la ong u bah Wanborlang.

U la pynpaw ba ki kwah ban kham pyntbit tangba um don bai siew namar ba hap ban bsa ia ka iing ka sem.
Ha kajuh ka por, u la ong ba u nang ruh ban shna trok ne ban pynkylla dur lada u ioh lad hynrei namar bym don lad namar bym don pisa ban thied ia ki hynrei lada dei ba ioh lad ban thied, u kwah ban pynwan dur thymmai ia ki. “Nga don ka jingmut lada iohi ia ka buit bad tangba kumta, nga la lap buit”, la ong u bah Wanbordlang.

Ha kajuh ka por, ka kmie jong u, ka kong Bipulsha Kharbudnad ka la iathuh ba u khun jongka, um ju kwah ban ialehkai bad ki para khynnah hynrei u dem beit khui ban shna kali kai marwei.
“Haduh ba u la shongkurim ruh u bteng beit ia kane ka kam jong u bad nga ruh, nga la ong ia ka pyrsa kurim ba kan ym khnium hynrei ailad beit ia u”, la ong ka kmie u bah Wanbordlang.