Na ka juh ka ing , la ka jong ka party ha ka MDC- 2014

Shillong,5 Rymphang:
Ka elekshon MLA -2013 ka dei ka elekshon kaba la bun bha ki shiing shi sem kiba la ia khun elekshon, ki la don kiba la iakhun shi kpa shi khun, ki don ki shi lok, ki don ki shi para, ki don kiba shi kni shi pyrsa ruh. Lah ban pynkynmaw ba ha ka elekshon ba dang shu dep ha u 2013, u bah Pynshai Manik Syiem bad ka khun jong u ka kong Teilinia Thangkhiew ki la ia khun kum ki kyrtong shimet, u bah Charles Pyngrope na ka Congress bad u khun jong u u David Nongrum kum u kyrtong shimet ( ym ioh tiket Congress), u Bah Donkupar Massar bad ka kurim jong u ka kong Grace Kharpuri kum ki kyrtong shimet, u Dr.Mukul Sangma bad ka kurim jong u na ka Congress. Haba phai sha katei ka elekshon ngi iohi ba ki shi shi sem ki la ialeh ban ia khun na ka juh ka tnum bad na ka juh ka party, lait noh na ka daw jong ka jingbym ioh tiket.
Hynrei mynta ka elekshon MDC-2014 ka long phylla palat namarba ki shiing shisem ki mih madan ban ia khun elekshon na la ka jong ka ka jong ka seng, u Bah P.M Syiem u la pyniasoh KHNAM bad u dei u kyrtong ka KHNAM na Mawphlang Diengiei Konstitwensi katba ka khun jong u ka kong Teilinia Thangkhiew ka la pyniasoh HSPDP bad ka dei ka kyrtong ka HSPDP na Mylliem Konstitwensi. U Bah J.C Diengngan u kyrtong shimet na Mawthadraishan u la iakhun ha ka MLA elekshon kum u kyrtong shimet (duh tiket UDP) katba mynta pat un ia khun kum u kyrtong ka Congress katba u para jong u u Airmarshall un ia khun kum u kyrtong shimet( um shym la pan tiket Congress hynrei u la shah pynduh tiket na ka UDP). U Bah PK Raswai un ia khun na ka tiket UDP na Langrin Konstitwensi katba u para jong u –u Bah Enbin Raswai wat la un ym ia khun elekshon hynrei u dei pat u radbah jong ka HSPDP. Kiba bun ki paidbah ki lyngngoh ia ka jingiapher party jong ki kyrtong kiba mih na ka juh ka ing.