Na ka jingthang khlaw ki runar, kylla dpei ka longiing ha Nongmawlong

Nongpoh, 03 Rymphang:
Ha kawei ka jingjia pluh iing kaba la jia mynta ka janmiet ha ka por 6 baje ha shnong Nongmawlong, ba hap hapoh ka Umsning C&RD Block, ha kaba kawei ka longiing kaba dei jong ka Kong Aitimon Nongrum bad u Bah Augustine Lyngdoh, ka la shah bamduh ha ka ding kaba shyrkhei haduh ban da ingkhong bad kylla dpei.
Katkum ka jingtip ia kaba la ioh ban lum da ki nongthohkhubor, la ong ba katei ka longing ka don haduh 7 ki khun ba kynthup 3 ngut ki Kynthei bad 4 ngut ki shynrang, hynrei donbok ha katei ka por ba jia katei ka jingpluh ym shem la don briew ha iing.
Shuh shuh, la ioh jingtip ruh ba ka daw hi kaba la pynlong ia katei ka iing ba kan pluh, ka dei namar ka jingdon jong ki runar kiba thang khlaw na shawei ka jaka, hynrei kawei ka ding suki suki ka la pur hajan jong katei ka iing, tad haduh ba kan da bam duh syndon ia baroh ki jingdon jingem ha katei ka iing bad haba khein kyllum ka la kot sha ka T. 2 Lak tam.
La ithuh ruh ba na ka liang ki paidbah nongshong shnong, ki la pyrshang ban ai jingiarap ban pynlip ia ka ding, hynrei namar ba ka ding ka la ioh lad ban pur ha sawdong jong ka iing, kane ka jingpyrshang jong ki paidbah ban iarap ka la shu pulom noh ha kaba naduh ka iing bad baroh ki jingdon jingem ki la kylla dpei na ka jingbamduh jong ka ding kaba shyrkhei.