Na ka jingteh kyndon ki pulit Mumbai, kylli u samla “Da ka sticker rong aiu, ba ngan tah, ba ngan leit sha iing ka samla”

Mumbai: Ha kine ki sngi, ka don ka jing pyrkhing ia ka leit ka wan bad ka iaid ka ieng jong ki paidbah ha Mumbai, hynrei, uwei u samla briew, u don ka jing donkam kaba kyrpang eh bad ka jing duhthiah duh dem bad pisa mynsiem kaba palat liam bad kata ka long, ba um ioh ia kynduh ia ka samla jongu, na ka daw jong ka jing pyrkhing ha ka nongbah Mumbai bad kumta, utei ula kylli, la u lah ban pyn donkam, da ka kynja rong aiu, ba un mih na la iing bad leit ia kynduh ia ka samla ba ieid thep mynsiem jongu.

Katei ka jing kylli, ka mih, namar ba ki pulit, ki la bthah, ba kito kiba leit sha ki jaka ba donkam eh, ki dei ban tah da ki sticker.

U Ashwin Vinod, u samla briew, kumta ula thoh ha ka twitter jongu, ha kaba ula kylli, la un pyn donkam da ka rong aiu, namar ba u kwah ban tah sticker ha ka kali ban leit ia kynduh ia ka samla jongu.

“Pulit Mumbai, da ka sticker, kaba don rong aiu, ngan tah ha ka kali jongnga, ba ngan mih ban leit sha iing ka samla jongnga. Nga la kynjah palat ia ka” ula thoh ha ka twitter.

Ka jubab na ki pulit ka Mumbai, ka long ba katei ka jing donkam, kam dei satia kaba donkam eh bad kam hap ruh ha ki kyndon kiba donkam kyrkieh than bad kumta, ki la bthah ba un shong khop ha iing.

“Ngi sngewthuh iaphi sir, ba phi donkam eh ban ia kynduh ia ka samla jongphi, hynrei katei kam hap satia ha ki kyndon kiba donkam eh jongngi. Ka jing ia jngai jongphi, ka ailad ruh ka jingieid kan nang jylliew shuh shuh, na kaba ju long bad ba phin ioh ruh ia ka met kaba koit ba khiah. Ngi kwah ba phin ioh ia ka jingim kaba bha nangne shakhmat, kane mynta, ka dei tang khyndiat ka jingeh” jubab ki pulit Mumbai.