Na ka jingrakhe ia ka Meghalaya Day mynta ka sngi la pyni ia ka phlim “Apot”

Shillong: Ia ka phlim “Apot” ka ba la pynwan dur ha ka khana puri skam jong u Tiewlarun la pyni khyndiat mynta ka sngi ha State Central Library Shillong ia kaba la plie da u Director ka tnad Art and Culture u bah W Nongsiej ha ka jingiadon lang u director ka ICCR u Manish Singh jong ka sorkar pdeng.

U bah Raphael Warjri ba long u nong pynmih ia kane ka phlim u la ia thuh ba ka khana ha kane ka phlim la pynwan dur ha ka khana puri skam jong u Tiewlarun bad bun ki bynta jong kane phlim la ringdur ha ki bynta jong ka thain Mawkyrwat.

Na ka liang u Bah W.Nongsiej u la kyntu ia ki briew kiba don ia ka sap shna phlim ba kin wan sha khmat ruh ban pynmih ia ki phlim kiba ia dei bad ki riti dustur jong ki briew kane ka jylla Meghalaya.

U la ong ruh ba ka kam jong ka tnad Art bad Culture ka long ba pynneh pynsah ia ki riti dustur, ban leh ia kane ka shong ha ki paidbah ba kin pynmih ia ki phlim kiba ai dei bad ka Riti Dustur,bad rug ban ai jingiarap ha kaba ai dei bad kum kine ki phlim.

U Director jong ka ICCR u Manish Singh u la ong ba kan long kaba eh ha kane ka juk mynta ba ki briew kin pynmih ia kine ki phlim kiba ia dei bad ka Riti Dustur namar ba ki ia beh ban pynmih ia ki phlim ba don jingmih. Ha kane ka sngi la ia don bun kiba la iapoi ban sakhi ia ka jingpyni paidbah ia kane ka phlim.