Na ka jingneh jong u slap, shlei um bad twa khyndew ha West Khasi Hills

Nongstoiñ: Hadien ka jingneh jong ka jinghap slap mynta la katto katne sngi, ka thaiñ West Khasi Hills District ruh ka la mad ia ka jingshlei um bad ka jingtwa khyndew ha kiba bun ki jaka bad ki surok.
Katkum ka jingioh jingtip la ong ba myn hynnin ka sngi ka la don ka jingtwa khyndew ha ka surok bah Nongstoiñ -Riangdo katta ha kawei na ki jaka hajan ka shnong Sienduli, bad kumjuh hajan ka shnong Riwiang bad kumjuh ha ki bynta jong ka surok Pyndengrei- Mawthawniaw ha kaba kane ka jing twa khyndew kala pynlong ban khang lynti noh ia ka iaid ka ieng lyngba ka tei ka surok.
Shuh shuh la ioh jingtip ruh ba ka jingneh jong u slap kala pynlong ruh ban shlei um ha ki bynta jong ka shnong Kynshi bad na kaliang jong u Sordar ka shnong Kynshi Bangla u la pyntip ba la don kumba san tylli ki long iing kiba la hap ban mih noh na ki iing bad leit shong ha ki iing jong ki para marjan kumba la pynbeit da ka shnong.
Halor katei ka bynta na kaliang jong u Deputy Commissioner ka West Khasi Hills u la pynbna da kaba ong ba ka jinghap slap kalah ban nang bteng kumta u la bthah ruh ia baroh ki nongshong shnong khamtam ia ki to ki long iing kiba sah bad ki ba don harud jong ki wah ba kin sngewbha ban kin long kiba husiar.