Na ka jingkyrduh kam, ki phew hajar ngut ki la leit sha kiwei ki Jylla

Na ka daw ka jingkyrduh kam kaba shyrkhei ha Meghalaya, da ki phew hajar ngut ki samla ha kine ki snem kiba bun, ki la hap ban jam sha kiwei ki jylla ban pynbit pynbiang ia ka jingdonkam jong la jong bad ka jingdonkam jong ka iing ka sem. Ha kane ka thma Covid-19 la iohi ba ki samla ki ba trei shabar ka jylla lajong ki la hap ban leit phai sha ka jylla trai ka jong ki.

Ha kaba ia dei bad ka jylla Meghalaya ruh la lap ia ka juh ka jingjia, ha kaba, da ki phew hajar ngut ki samla ki la wanphai sha ka jylla trai ka jong ki, bad ki la duh ei ia ka kam ka jam kaba ki juh trei baroh shi katta, namar bun ki company shimet kin khang khyrdep lane kin pynduna ia ki nongtrei ki jong ki, namar ka jingshah ktah ka ioh ka kot ha ka lockdown. Na ka jylla ka jong ngi ruh bun ki bymdei ki trai jylla ki la hap ban leit phai noh sha ki jylla trai ki jong ngi.

Kum ka seng ngi sngewthuh ba ka jingeh kaba khraw jong ka sorkar jylla kan wan hadien ba kane ka jingialeh bad u Corona Virus kan suki lane kut noh. Kumno ban pynthikna ia ka ioh ka kot kaba biang jong ki phew lakh tylli ki long iing? Kumno ban plielad ioh kam ioh jam ia kine ki samla ki ba la wanphai bad ia ki samla ki ba la shong khlem kam khlem jam lupa?.

Ha kaba iadei bad ka jingplielad ia ki samla kyrduh kam ki jong ngi, lehse, kane kadei ka kabu ia ka sorkar ka jong ngi, namar ki bymdei ki trai jylla ki la leitphai. Lada ka sorkar ka don ka jingkitkhlieh ia ka lawei ki samla ka jylla, ngi la khmih lynti ba kan pynthikna ba kano kano ka kam lada dei jong ki company ne jong ka sorkar (private lane Public) yn trei beit da ki samla trai jylla. Phewse ka long kaba sngewsih ban iohi ba ka sorkar ka rai pynban ban wan ialam nongtrei bylla da kiba nabar jylla. Kane kadei ka Rai pyrshah ia ki samla ka jylla bad pyrshah ia ka koit ka khiah jong ki paidbah ka jylla bad kane ka pynpaw shai ba ka sorkar kam don ia ka jingkitkhlieh naka bynta ka bha ka miat jong ki trai jylla. Lada ia u/ka ba napoh ka jylla la pynbor ban leit bylla shabar ka jylla bad ia kiba nabar ka jylla ka khot sngewbha ban wan bylla hapoh ka jylla, shano ka lawei jong ka jylla jong ngi.

Ha ki kyntien kiba shai, ngi pynrem bad pyrshah jur ia kane ka rai ka sorkar bad ka seng kan ym randieh ban kit ia la ka lyngkor ha kipor ba donkam. ,

Sd/- Thomas Passah,

President,

KHNAM State Youth Wing, 8787612855.