Na ka jingiakhih ki samla pule NEHU, hiar ki heh BJP ka jylla sha Delhi

Shillong:Ka kynhun ba la thaw da u President ka seng BJP Meghalaya, ba la ialam da u AL Hek myntri sorkar jylla, u bah M Kharkrang nongaiktien rangbah ka BJP, u Dr E Myrshing General Secretary & u David Kharsati Executive Member, kaba dei ban peit ia ki kam jong ka NEHU ki la leit sha New Delhi ban iakynduh ia ki nongialam ka BJP bad ia u myntri ka pule puthi. Kane ka long hadien ba ki la ïakynduh ïa ki nongïalam jong ka NEHUTA & NEHUSU ha Shillong.

Kitei ki heh BJP, ki la pyntip sha u Myntri ka tnat Pule Puthi jong ka sorkar pdeng u Dr Sukanta Majumdar halor ka jingeh jong ka NEHU bad ka jingdonkam ban pynbeit ïa kane ka kam na ka bynta ka jingmyntoi jong ka skulbah ha ka jinglong kyllum ki samla pule. Katei ka kynhun, kan iakynduh ia u myntri ka tnad pule puthi jong ka sorkar pdeng u Dharmendra Pradhan ha ka por janmiet.