Na ka jingiai bteng ban test, ka Jylla kam hiar ha ka khlam Covid

Shillong:Hadien ba u Myntri jong ka Sorkar Kmie ba dei khmih ia ka tnad DoNER, u Dr Jitendra Singh u la pynpaw ba ka jingpang Covid-19 ka la sdang ban hiar ha baroh kiwei kiwei ki jylla jong ka thaiñ shatei lam mihngi jong ka Northeast katba ha ka jylla Meghalaya pat ym pat iohi satia ia kata ka jinghiar jong ka khlam bad ia kane la pynpaw ha ka jingialang ban khmih ia ka jinglong jingman jong ka khlam Covid-19 ha baroh ki jylla kiba don ha ki thaiñ shatei lam mihngi.

Haba kren sha ki lad pathai khubor, myn hynnin ka sngi ka 6 tarik u bnai Naitung 2021, u Bah AL Hek u ba dei u Myntri jong ka tnad ka koit ka khiah ka Sorkar Jylla, u la ong ba ma u hi um nang satia ban batai stad ia ka jinglong jingman bad ka jingtreikam jong kiwei ki jylla hynrei ka jylla Meghalaya hi ka la shimkhia hi haduh katta katta naduh ka jingtest ia ki paidbah, ka jingdon jong ki Corona Care Centre bad ka jingai ia ka tika hynrei u la ong ba ka jingbym hiar jong ki briew kiba ioh ia kane ka jingpang ha ka jylla ka dei namar ka jingiaibteng beit ban leh test ia ki paidbah katba sha kiwei kiwei ki jylla pat ka jingdon ki positive case ka don tang khyndiat eh namar ba kim da leh test than shuh hynrei ka Sorkar Jyllla ka trei hok bad ka kam ruh ka paw hok bad na kata ka daw ki jingeh ruh ki paw bun.

U Bah Hek u la ong ruh ban pynduna ia kane ka jingkiew jong kane ka khlam ka long tang lada ki paidbah ki bud ryntih ia ki kyndon ba la bthah da ka Sorkar bad ka tnad ka koit ka khiah na ka por sha ka por ban iada ialade hynrei lada ki paidbah kim kohnguh satia ka mut ka jingpang ruh kan iai kiew beit hi.