Na ka jingeh, shim kabu ki lehnoh, ban khring ia ki samla

Shillong 21, Jymmang:
Ki lehnoh ka thain North East kynthup ha kane ka jylla Meghalaya ki shim kabu ban khring ia ki samla namar ka jingeh kiba don ha kane ka thain, la ong u Symbud Myntri Rangbah u Dr RC Laloo

Haba kren ha ka jing rakhe ia ka sngi pyrshah ia ki kam pyntriem ha ka ri hynne ka sngi kaba long ha phyllaw ka Secretariat, u Dr Laloo u la ong ba ki kam pyntriem khamtam ha ki jylla kum ha Assam, Nagaland, Manipur, Tripura bad ruh ha Meghalaya ki nang kharoi watla ka sorkar ka la iakhun ban pynjah noh ia ki la sanphew snem mynta

Ha kane ka jingrakhe pyrshah kam pyntriem la don lang ka myntri kam pohiing ka jylla Kong Roshan Warjri, myntri ka

tnad PWD u Bah Sniawbhalang Dhar, u Chief secretary Bah WMS Pariat, u Director General of Police (DGP) u PJP Hanaman nalor kiwei ki babu sorkar

U Dr Laloo u la ong ba kane ka thain ka don shibun ki jingeh bad namar kane, ki kynhun seng lehnoh ki la shim kabu ban khroh ban khring ia ki samla ba kin rung sha ka lynti ka bym dei

U la ong ba “ki riew pyntriem ki pyndonkam ia ki samla da kaba pynthame da kaei kaei ka bym lah long”

U la ong ba ka jylla Meghalaya ruh ka la mad ia kum kane ka jingeh kaba kiwei ki jylla ki iakynduh

“Bun ki mynsiem ba lui lui ki la duh ei, ki briew ki im ha ka jingsyier”, u la ong bad bynrap ba ka jingkharoi ki kam pyntriem ka la khang lad ia ki kam pynroi bad ka khaii pateng

U la kyntu ia ki paidbah ban pyrshah da ka bor bad ka buit baroh ia ki kam pyntriem ha kano kano ka rukom ruh

Kane ka sngi ka jia lang ruh ka sngi iap jong u myntri rangbahduh barim ka ri u Rajiv Gandhi uba iap ha kti ki riew pyntriem ha u snem 1991

Ha kane ka jingrakhe, u Laloo u la pyniaid ruh ia ka jingpule bam smai ban iakhun pyrshah ia ki kam pyntriem