Jowai: Ka All Jaintia Transporters Association (AJTA) ka la kynnoh ba ka jingpyllait challan ka tnad Forest sha ki katto katne ki riew shimet bad wat sha ki katto katne ki Ophisar ka tnad Forest ka la wanrah ka jingduh nong kaba khraw ia ka sorkar jylla.
Ka Incidental Challan ka dei ka challan kaba ju ai da ka tnad Forest haba mih ki mar pohkhyndew ha ka por ba tih Iurim Iing ne kiwei kiwei ki jingtrei, hynrei ki riew shimet kiba khaii mawshun da ka jingiasuh buit sop sop bad ki briew jong ka sorkar ki la shim kabu ia kane da kaba pynlong ia kane ka Incidental Challan kum kawei na ki lad ban khaii ia u mawshun na ka thain Jaintia sha kiwei pat ki jylla jong ka thain Shatei Lam Mihngi bad wat shaduh ri Bangladesh.
Na ka liang u Secretary ka AJTA ki la pynpaw ia ka jinglyngoh kaba khraw halor kane ka jingiohlad ki riew shimet ban shim kabu ha ka kyrteng jong ka Incidental Challan ban khaii mawshun.
Ka AJTA ka la pynpaw ruh ia ka jinglyngngoh halor ka jingmih ki Incidental Challan kiba da ki lakh ton ha ka jingshisha haba pynmadan jaka ne tih Iurim iing ka ju mih tang da ki katto katne ton, hynrei da ka jinglehbuit lane leh thok la pynmih ia kum kane ka Challan kaba da ki lakh ton.
“Ka Royalty na kane ka Incidental Challan ka long tang T. 100 tyngka shi ton, katba ka royalty na ki trai par mawshun kiba don ia ka Mining lease pat ki hap ban siew haduh T.255 tyngka shiton. Ka jingiohlad ki katto katne ki riew shimet ban pyndonkam da katei ka Incidental Challan ka la wanrah ia ka jingduh nong kaba khraw ia ka sorkar jylla”, la ong u Secretary ka AJTA, u Kyrshan Dkhar.
Na ka liang utei u nongialam ka AJTA u la ong ba lada ka long ha kane ka dur ba ia ka Incidental Challan la pynlong Challan ban ia khaii paidbah, ka sorkar lane ka tnad Forest ka la dei ban ai laitluid noh ia ki Incidental Challan sha baorh ki paidbah ym tang sha ki katto katne ki riew shimet bad ki ophisarr sorkar.
Halor kane, na ka liang ka AJTA kan sha shimkhia bad kan sa leit ban ujor pyrshah sha kiba halor lada ka tnad Forest ha Jaintia HIlls kam shimkhia satia ban peitngor halor kane, la pynkut ka khubor na katei ka seng.
Phi don ban ong eiei?