“Na ka iathoh shong kurim” hiar ka pakhang shnong 12 kynta

Shillong, 17 Nailur:
Ka pakhang shnong kaba la pynbna ban long 24 kynta naduh ka 5 baje mynstep ha ka 20 tarik haduh 5 baje mynstep ha ka 21 tarik Nailur la pynjyn sur noh sha ka 12 kynta namar ka jingud na ki nongkyntiew kurim.
Haba pynbna ia ka ne, u vice president ka KSU u samla Frederick Khawmawphlang u la ong ba ki sengbhalang ki la rai ban pynjynsur noh ia ka pakhang shnong na 24 kynta sha ka 12 kynta ha ka 20 tarik khnang ban ailad ia kiba don jingkyntiew kurim. “Ka pakhang shnong kan treikam noh tang naduh ka 5 baje mynstep haduh ka 5 baje janmiet ka 20 tarik”, la ong u vice president ka KSU haba pynlait khubor lyngba ka sms da ka mobile. “Ngi sngewthuh ba ha katei ka sngi kin don kiba kyntiew kurim, kumta ngi kyrpad ia kito kiba leit sha iing kyntiew kurim ha ka por mynsngi, ki dei ban pyni dak da kaba teh baloon najrong kali khnang ban ithuh bad sngewthuh”, la ong u samla Kharmawphlang.
U la ong ba la shim ia kane ka rai hadien ba la ioh ia ka jingud na ki Balang bad ki briew khamtam kiba leit sha ki iing kyntiew kurim ha kylleng ki jaka jong ka jylla bad khamtam ha ri Khasi bad Jaintia.
Ha kajuh ka por, u la pan ia ka jingiatreilang jong ki paidbah namar ba ki sengbhalang ki iakhih dei na ka sorkar kaba la leh kuman ia ka jingdawa ban pyntreikam ia ka Inner Line Permit. “Para ri wat sngewthuh bakla, wat shah ialam bakla, namar ka sorkar hi kaba pynbor ia ngi ban iakhih”, la ong shuh shuh u vice president ka KSU.