Na ka daw ka Red Card, pait ka khlieh u samla na Ryngud

Shillong, 6’lyngkot:
Ka la mih ka jingkulmar kaba la khluit bha ha ka jingialehkai phutbol kaba la long mynta ka sngi ha madan ia lehkai phutbol kaba don ha Saitsohpen, Sohra. Katei ka jing kulmar ka la mih ha ka jingialehkai League hapdeng ka Seng Samla Ryngud bad ka Mawphu Sport Club bad katei ka jingialehkai ka dei kaba donkam tam ia kitei ki ar tylli ki kynhun ha kaba kaba jop kan ioh rung sha ka Quarter phainal.
Katba ka jing ialehkai ka dang iaid ka la don ka jingiabakla hapdeng ki ar ngut ki nongialehkai na kitei ki ar kynhun ha kaba la sdang ban mih ki jingia pyni bor hapdeng ar ngut ki nongialehkai hynrei ha katei ka por u rephri u la beh noh ia baroh ar ngut na kitei ki ar kynhun da kaba ai da ka rong saw (Red Card). Kitei ar ngut kiba la shah ai rong saw ki dei u Edilbert Shanpru u nongialehkai ba phong ia ka jersey no 11 na ka Seng Samla Ryngud bad uwei pat u dei u Precious Nongrud jong ka Mawphu SC.
Hadien ba kitei ki ar ngut ki la shah beh na madan ka jingialehkai ka la iaid beit, hynrei shuwa ban kut noh artad ka por la iathuh ba u Precious uba la lawnoh ia kijain ia lehkai bad phong da ki jain ing u la tur kham shajan ka jaka ba shong ki Seng Samla ryngud bad la iathuh ba ha ka por ba u rephri u put pynkut artad hangtei u la bom kynsan ia u Edilbert da u maw. Tang mar ia jia kumtei thlim la mih ka jingiakulmar hapdeng kitei ki arliang ha kaba baroh ki la ia tur ban ia pyni bor, hynrei ki nongpyniaid katei ka jingialehkai ki la lah ban tem ia ka ding kaba klang bad la pynkit ia uba mynsaw sha CHC Sohra bad ha kajuh ka por la pyntip sha ki pulit bad kham sa shiphang ki pulit ki la poi sha katei ka madan. U Edilbert u la mynsaw jur na ki bynta ka khlieh bad haba la poi ha CHC Sohra ki doktor ki la suh ia ka khlieh jong u ar ksai.
La ong ba ki nongpyniaid ia katei ka jingialehkai bad ki nongpyniaid jong ki ar kynhun ki la donlang ryngkat ki pulit ban ia kren halor katei ka jingjia bad haba khadduh baroh ar liang ki la hun noh ha ka jingiasuk. Ha kaba ia dei bad katei ka jingjia ka Association ba pyniaid ia katei ka jingialehkai ka la pynpaw ia ka jingsngewdiaw ba ka thong ba la pynlong ia katei ka lympung ban kyntiew ia ki samla ka thaiñ ka long pynban ha katei ka dur bad ki la ong ba nangne shakhmat kin shim da ki kyndon kiba tyngeh ban ym mih shuh kaba kum katei ka jingjia.