Jowai: Ka kynhun kaba dang shu seng thymmai bad kaba la tip kum ka Jaintia Amalgamated and Redressal Forum (JARF) kaba kynthup ia ki sengbhalang, ki nongrep, ki driver trucks, ki nongbylla bad ki riew pawkhmat na district naduh ki MLA, MDC barim ka la khot ia ka Jingialang Paidbah na ka bynta ban iakren halor ka jinghiar ka ioh ka kot jong ki paidbah ha Jaintia Hills baroh kawei.
Ia kane ka jing ialang paidbah yn pynlong ia ka ha ka 9 tarik une u bnai ha Madan Ialehkai ka shnong Tuber-Shohshrieh, East Jaintia hills.
“Kane kadei ka Wyrta ka Shula shaphi baroh ki khun ka ri Jaintia ba ngi don ka jingsngewkhia halor ka jinghiar ka ioh ka kot ka kamai ka kajih ha kine ki san snem tam naduh ba la shah khang tih Dewiong kaba la ktah ia baroh naduh ki heh sphah kiba don ki dukan haduh ki nongbylla”, la ong ka khubor na U Chairman ka JARF u ma H. Phawa, MDC barim.
U la bynrap da kaba khot ba wer ia baroh ki paidbah kiba shah ktah ha ka ioh ka kot lyngba ka jingshah khang tih Dewiong ban wan sha katei ka jingialang.
“Hooid ka Iing Bishar badon Burom kaba ha khliehduh, Ka Supreme Court ka la dep ban pyllait ia ka jingkhang tih Dewiong, hynrei haduh mynta ka jingtih dewiong kam pat lah ban long namar ba ki paidbah lane ka trai par, baroh kim pat sngewthuh ia ka ain MMDR Act.
Ha kane ka jingialang Paidbah, kin don ki Riewstad Ain, ki Nongiasaid Ain bad kiwei kiwei ki riew pawkhmat ka Jaintia Hills kin ai ka jingpynshai sha ki paidbah halor ka AIN MMDR bad ruh halor kiwei kiwei ki jingeh kiba khraw ha kaba iadei bad ka kamai kajih jong ki paidbah ka thain, la iathuh u Chairman katei ka Kynhun.
“Ia mih paidbah ban pyni ba ngi don ka jingkitkhlieh na ka bynta ka jakpoh la jong ha ka iing ka sem jong ngi”, la pynkut utei u nongialam ka JARF.
Phi don ban ong eiei?