Na ka bynta ban ioh sdang biang ia ka jingtrei ha Umwali Kynduh DC bad Engineer MeECL ki 4 Seng ka West Khasi Hills

Nongstoiñ: Ki Sengbhalang ka thaiñ West Khasi Hills kiba kynthup ia ka HYC,HANM, WKSU bad WYF myn hynnin ka sngi ki la leit ban ia kynduh ia u Deputy Commissioner ka West Khasi Hills District u Bah T. Lyngwa ha ryngkat ka jingthoh ban dawa ban phah trei noh ia ka jingsam bording ha ka shnong Umwali kaba don ha ki thaiñ Langpih namar ba ia katei ka jingtrei la pynsangeh da ki pulit Assam ha ka 14tarik Rymphang 2019 kaba la poi ruh shaduh u pud jong ka jingiaklumar bad jingiamynsaw.
Shuh shuh kitei ki nongialam jong kitei ki Seng, ki la dawa ruh na u DC ba dei ban ai jingiada ia ki nong trei ki ban trei ha katei ka shnong khnang ba ka jingtrei kan ia sted namar kan don ka jingiaseng ha katei ka shnong ha u bnai Lber.
Ha kaba iadei bad kitei ki jingdawa jong kitei ki Seng na ka liang jong u DC u la bthah ba kin leit ia kynduh shwa ia ka tnad MeECL bad ai jingthoh khnang ba na ka liang jong ki kin ioh ban ai jingtip sha u bad ruh ban leh ia kaba donkam.
Hadien katei ka jingbthah u DC na ka liang ki Sengbhalang ki la leit ruh ban ia kynduh ia u Executive Engineer R. E Construction Division Nongstoiñ MeECL u Bah Shullet bad ha katei ka jingiakren u EE u la kular ba un sa leh ia katei ka kam hadien ka ilekshon MDC bad un sa ia kren ruh bad ki bor ki ba halor.
Na ka liang jong ki Sengbhalang ki la buh jingkylli ruh ia u EE ba katkum ka jingiathuh ki bor jong ka District ka jingmih ka jingklumar ka dei na ka daw ka jingbym pyntip na ka ophis bording bad na ka liang jong u Engineer, u la ong ba ka jingpyntrei ia katei ka jingtrei ka long katkum ka Letter of Allotments (LOA) kiba hap ha ka khyndew ka shyiap jong ka Meghalaya kumta ka pynlong ia kitei ki Contractor ban trei beit namar ki lah dep trei ruh ia ki bynta sha Langpih kum ka Mawsikar bad kiwei kiwei.
Katei ka jingjubab u Engineer ka la pynlyngngoh ngain ia ki Sengbhalang bad buh jingkylli ruh ba kumno ki pulit Assam ki wan mushlia ia ki bynta jong ka Meghalaya bad balei pat ka Sorkar Meghalaya kam lah ban ai jingiada ia ki jaka la jong na ki pulit Assam bad ki la kynnoh ruh ba katei ka pynpaw ba ki bor District kim tip ei ei ia ka jingdon ki jaka ki puta la jong ban pyntrei ia ka roi ka par.