Na ka bih ja sngi ha Bihar, iap ei u samla Class IX narum Pynursla

Shillong,19 Naitung:
Ka jingiap jong ki 22ngut ki khynnah skul, na ka daw jong ka jing ngat bih, na kaba bam ja sngi ha Bihar, ka la pynduh noh ia ka jingim jong uwei u samla uba na ka shnong Pyrnai, kaba don harum jong ka Shnong Pynursla.
Utei u khynnah u dei uba la tip kyrteng kum u Augustlang Binan, na ka shnong Pyrnai. U dei u khynnah uba dang shong klas IX uba dang don ha ka rta 14-15 snem, u khun jong u bah Hobar Khongsdam.
Haba ia kren bad u Rupang , u Bah Bar Khong lam u la iathuh ba utei u khynnah u la shong la sah ban leit pule sha Bihar la 5 snem eiei bad ha kine ki san snem ba u la leit pule hangtei, u la wan ing khadduh eh ha u snem 2011, bad shuwa ia kata u la wan ing tang shisien kaba long tang arsien ha kitei ki san snem ba u la shong ha Bihar.
Haba la kylli hato ia ka met iap jong u kin tep ha Bihar ne kin wanrah sha ka shnong jong u, U Bah Bar u la iathuh ba ia ka met jong utei u khynnah kin pynpoi hi na Bihar sha Guwahati bad kiba haing ha sem kin sa leit shaw na Guwahati ha kaba u la iathuh ruh ba ka met iap jong utei u khynnah ka lah ban poi lashai ne la shisngi. Ki kmie ki kpa jong utei u khynnah haduh mynta ki shu iai ap ia ka met u khun jong ki ban wan poi sha Guwahati.