Na ka ain jingtip paidbah, khih ka KHADC ban thaw polisi thungkam

Shillong, 24 Iaiong:
Shi sngi hadien ba la lap da ka jingtip lyngba ka ain jingtip paidbah, kaba la thad madan ia ka jingthungkam ia kiba haiing hasem bad ki bym pat pas ia ka kyrdan ba biang ha KHADC, ka KHADC ka la khih khohreh mynta ban thaw noh da ka polis thungkam.
Ngin thaw noh ia ka polisi thungkam la kajong.  Ngi kwah ban pynthikna ba kan don ka jingthungkam kaba khuid bad kaba shai ha ka”, la ong u CEM ka KHADC Bah Adelbert Nong rum  mynta ka sngi Thohdieng sha ki nongthoh khubor.
Haba kubur ba ka Council kam don ia ka polisi thungkam kaba biang, u Bah Nongrum u la ong ba kam pat slem ia ka Council ba kan thaw ia kane ka lynti iaid kaba thymmai ha kane ka bynta.  ”Ngi pdiang ba ka don ka jingdkoh ha ka rukom thungkam ha ka Council haba don ki kam ba lait ha ki snem ba la dep.  Hynrei kane ka jingdkoh yn sa pynbeit noh. Ngi kut jingmut ban wanrah ia ka dur ka dar jong ka Council kaba bha”, la ong u CEM ka KHADC. Katkum ka jingong u CEM, ka Executive Committee (EC) ka la pynkhreh ban thaw ia kane ka polisi thungkam bad yn sa pyn treikam noh mardor. U la ong ba la don ka jingthmu ban thaw ia ka met kaba laitluid ban pyniaid ia ka rukom thungkam ha ka Council. ”Nangne shakhmat ka jingthungkam ha ka Council, yn pynshong nongrim katkum ka jingtbit bad ka jinglah jong ki nongialeh ia ka eksamin.  Ngi kwah ban weng noh ia ka jingleh mon jong ki politishian”, la ong u Bah Nongrum. U CEM ka KHADC  u la ong ba ka jinglong jingman kumba ka long mynta haba ianunor bad ki 35 snem ba la dep, ka iapher bah bak ly bak namar ba ha kito ki snem, kiba pas ia ka kyrdan graduate ki dang duna bha. Ngi dei ban sngewthuh ba kiba bat ia ki kam ba heh ha ka Council ki kiew na ka jingioh kiew kyrdan.  Ngim lah ban khein troin ia ka jingtbit jongki, nga tip ia ka jingtbit jongki namar ba nga la iatrei lang bad ki”  la ong u CEM.
U la ong ba ka jingmih lyngba ka jingtip ba la ioh da ka ain jingtip paidbah, ka dei ka jingkyrsiew thiah ban pynbha ia ka rukom treikam ha ka Council. Shwa ia kane ka Synjuk Seng Samla Shnong (SSSS) lyngba ka ain jngtip paidbah, ka la lap ba ka jingthung kam ha ka Council la leh thuemur da ki politishian da kaba thung ia kiba haiing hasem khlem don ka rukom kaba dei ban leh.