Aizawl: Hadien ba ka dorbar Lok Sabbha, ka la mynjur ia ka ain Citizenship (Amendment) Bill, 2016, lane ka ain buhai shnong ia ki poiwir rit paidbah; u myntri rangbah ka Mizoram, U Zoramthanga, hynnin ka sngi, ula pynsngew ba un sa khot shen ia ka jingialang jong ka seng Mizo National Front (MNF), na ka bynta ban iakren, la kin dang iai bteng ne em ban don bynta bad ka North Eastern Democratic Alliance (NEDA), kaba dei ka kynhun synrop jong ki seng sain pyrthei jong ka dong shatei lam mihngi, ha kaba la ialam da ka seng BJP.
U Zoramthanga, un leit sha Delhi ha ka Sngi Saitjain ban wan, ha kaba un iakren bad ki nongialam jong ka sorkar India, ba kynthup ruh ia u myntri rangbahduh lem bad kiwei de ki myntri jong ka sorkar India. U Zoramthanga, u khot ia baroh ki Jylla shatei mihngi, ba kin pyrshah ia katei ka ain jong ka sorkar India.