Na ka 73 sha ka 56 hiar dor ka Petrol, ym pat khih ki bai kali rSah pongding ki jingdawa ka FKJGP ha MUDA

Shillong, 9 Rymphang:
Tang hapoh hynniew bnai ka dor jong ka umphniang kali ka Petrol bad ka Diesel la pynhiar haduh 12 sien, ha u naitung 2014 ka dor jong ka Petrol ka long T.73.75 tyngka shi litar katba ka dor jong ka Diesel pat ka long T.58.48 tyngka shi litar, bad ka jinghiar ka umphniang ka la long jan manla ki 15 sngi naduh u naitung 2014 kaba la long haduh 12 sien lynter bad kumba long mynta ka dor ka Petrol ka long tang T.56.36 tyngka shi litar katba ka Diesel pat ka long tang T.46.40 tyngka shi litar.
Hynrei hapdeng katei ka jinghiar dor kaba khah jong ki umphniang kali , la iohi ba ka dor ka bai kali haduh kam pat khih, lada phai sha ka liang ki kali sorkar ki sawkhmut rit ne ki saw khmut heh lane ka dor jong ki bai Taxi. Kham mynshuwa la pynkiew ia ka dor ki bai kali da kaba ai daw ba ka dei namar ka jingkiew palat ka um phniang kali kaba ki trai kali kim don lad shuh da kumwei pat hynrei ban pynkiew ia ka bai kali, katba mynta pat la iohi ba wat hapdeng ka jinghiar dor ka umphniang ka dor ka bai kali kam khih bad ka ne kumjuh.
Ka dor ki Taxi kamai bad ka dor ki sawkhmut ka iaid beit kumba ju iaid ha kine ki khyndiat bnai ba dang rem ka Petrol ne diesel, hynrei katei ka dor rem Petrol haduh mynta ka dang neh sah watla ka jingiapher ka dor mynshuwa bad ka dor mynta ka long haduh T.20 tyngka tam ka Petrol bad ka Diesel pat ka la hiar da T.12 tyngka tam.
Lah ban pynkynmaw ba khyndiat bnai mynshuwa, na ka liang ka FKJGP Central Body la la leit ba ujor ia ka jingkiew dor ki kali sawkhmut sha ka tnad MUDA bad ka la dawa ban pynhiar dor ia ka bai kali ki sawkhmut. Hynrei haba ia kren bad u bah Joe Marwein president FKJGP halor katei ka jingdawa jong ki kaba la long kham ha shuwa ban hiar dor ki umphniang hynrei haduh mynta ba ki hiar dor ym pat shym la pynhiar ia ka bai kali u bah joe u la ong ba haduh mynta ka MUDA kam pat leh eiei ia ka jingdawa jong ki bad shen na ka liang ka seng kan leit ban pynkynmaw biang sha katei ka tnad ba ka dei ban pyntreikam noh ia ka jingdawa kaba ki la dawa kham mynshuwa.