Na ka 1300 ha ka shi taiew, sa tang 700 thied masi na Khanapara rLah ban kiew dor biang kadDoh masi ha u snem thymmai

Shillong, 4 Nailar:
Ka Synjuk ki nongot Doh Masi kaba la tip kum ka Khasi Jaintia Butcher’s Welfare Association ka la pynshai paidbah halor ka jingkiew ka doh masi sha ka T.320 tyngka shi kilo. U bah Generous Warlarpih, Vice President katei ka Synjuk haba kren sha ki nongthoh khubor mynta ka sngi, u la ong ba shuwa ban pyn kiew sha katei ka dor thymmai ki nongdie doh masi, ki la shong jingia lang la lai saw sien ban pyrkhat janai bha ioh ba kan ktah ia u paidbah, hynrei u la ong ba hadien ba la ia khein ia diah bha bad hadien ba la ia pyrkhat ki nongot doh ki la shim ia ka rai ban pynkiew dor noh naba kam don jingmih eiei ia ki lada dang iai die ha ka juh ka dor.
U la ong ba ka daw ka dei naba la kiew dor palat ki masi na Khanapara bad ka daw ba la kiew dor palat ki masi u la ong ba ka dei ka jingtuid ki nongthied masi ki bym ithuh ithaw shuh sha katei ka iew die masi, kaba u la kynnoh ba kiba bun eh ki nongthied masi ki dei kito kiba khaii tuh sha Bangladesh.
Mynshuwa ka dor jong ki shi jur ki masi kiba khia kumba 80 kilo ka long T.38,500 tyngka ne T.39 hajar tyngka katba mynta pa ki juh ki masi ki shongdor T.44,800 tyngka shi jur. Ka dor ki masi kiba heh kiba 100 kilo ne tam u bah Warlarpih u la ong ba mynshuwa shijur ki shong dor T.47 ne T.48 hajar tyngka katba mynta ki la kiew sha ka T.55 hajar tyngka.
Mynshuwa u la ong ba ha ka shi taiew ki nongot doh masi, ki thied masi kumba 1300 tylli ha ka shi taiew, katba mynta ki thied tang hapoh 700 tylli ha ka shi atiew na ka daw ba kim nud ia khlieh dor shuh bad kitei ki nongthied masi khaii Bangla. U la ong ba ki nongialam katei ka Synjuk ki la leit ban ud sha ki bor jong ki Custom halor katei ka jingiaid tuh ki masi sha Bangladesh ha kaba ki Custom ki la kylli ia ka dor jong ki masi kaba ki la ong ba lada ki ioh bat kin die lilam sha ki, hynrei u bah Warlarpih u la ong ba kam ju don ka khep shisien ruh ba ki nongot doh kin thied masi lilam na ki Custom.
Nalor ka Khanapara ki nongialam katei ka Synjuk ki nongdie doh ki la ong ba ki la leit ruh ban pyrshang wad masi na kiwei pat ki jaka kum na Dhubri, Assam bad na Arunachal Pradesh hynrei haba ki leit sha kitei ki jaka ruh ki lap ba ia ka dor ba ki mang, ki nongkhaii masi sha Bangla ki la pyntam lypa kumba T.5 ne T.6 hajar tyngka. Ki nongialam katei ka Synjuk ki la pynpaw ka jingsngewkhia mynsiem ba lada ka dang neh katei ka dor iew ha Khanapara wat ia kane ka dor thymmai mynta ruh kim lah ban ia shan ha kaba tang ha u snem thymmai ki lah ban pynkiew noh sha ka T.300 tyngka ia ka doh khleh shyieng. “Ka ju long hi ia baroh ki nongkhaii haba ki khaii kim lah ban shu khaii duhnong” ong u bah Warlarpih.
Sa kawei pat ka daw kaba pynkyrduh masi bad ka jingkiew dor ki masi ha iew Khanapara ki nongialam katei ka Synjuk ki la ong ba ka dei ka jing bym burom u Syiem ka hima Mylliem ia ka Iewrynghep kaba ju long shisien shi taiew, naba hangthie ha Khanapara mynta la shu long iew manla ka sngi bad la ia die ia thied masi manla ka sngi katba nangne pat ki leit thied masi tang shisien shi taiew. Katei ka Synjuk ka kwah ba u Syiem ka hima Mylliem u dei ban pyrkhing noh ia katei ka iew ban ym ai laitlan ban pynlong iew man ka sngi hynrei dei ban burom beit ia ka iew rynghep ka iew kaba shisien shi taiew.
Lah ban kdew ba ka dor thymmai kaba katei ka Synjuk ka la pynbna na bynta ka doh masi kan treikam noh naduh lashai ka sngi ka 5 tarik u nailar, bad ka dor kan long T.280 tyngka ka doh ba khleh shyieng katba T.320 tyngka ka pasoh, ki la pynbna ruh ba ka dor jong ka doh Muslim, kiba donlang ha katei ka Synjuk kan long T.240 tyngka.
U Nongthohkhubor u la ioh ban ia kren bad ki nongialam katei ka Synjuk ban kylli kaei ka jingpher hapdeng ka Doh Khasi bad ka Doh Muslim naba ka dor ka ia pher bak lybak, ubah Generous Warlarpih u la ong ba ka doh ki Muslim ka dei kaba shu khleh lymbung beit naphang bad shyieng bad met nadong shadong, katba ka doh ki Khasi pat la pyniapher ha la ka jong ka bynta ka doh shyieng suda, ka doh pasoh, ka doh khleh shyieng, ka doh tar bad ha kiba bun rukom, kaba u la ong ba ki Muslim pat ki die beit sbuk katba ngat. Ki la batai ruh ba ki Khasi haba ki leit ban thied masi ot doh ki jied da u masi ba la biang pura ban ot doh uba sngaid ba plung katba ki Muslim pat ki thied naphang uba rit ne uba heh tangba la long ban ot doh bad teng teng da kaba punkhun ruh ki ot lang bad khun bad kmie.
U Rupang u la ioh ruh ban ia kren bad uwei na ki dkhot katei ka Synjuk ki Nongot doh uba dei u Muslim ban kylli kaei ka jingiapher hapdeng ka doh khasi bad ka doh Muslims, u Mohhhamed Sajad Khurshid u la ong ba um tip ha kano ka rukom ka ia pher ka dor, hynrei u la ong ba ka dor iew jong u ka dei hi T.240 tyngka shi kilo. Haba la kylli pat kaei ka jingiapher jong ka iew die masi ha Khanapara ia ki Khasi bad ki Muslim, u la ong ba ka dor thied na Khanapara ka dei hi mar kumjuh, utei u Muslim ba die doh masi u la ong ba ka iew die doh masi ki Muslim ka don tang ar ne lai tylli ha Polo.