Na iing dorbar Mawtawar yn treikam ka Mawlai Block

Shillong, 10 Naitung:
Ia ka Mawlai Block yn plie noh ha ka 18 tarik mynta u bnai bad kan treikam shipor na ka iing dorbar ka Mawlai Mawtawar.
Mynta ka sngi ka ophis jong u Deputy Commissioner ka East Khasi Hills ka la bthah ia u Block Development Officer (BDO) ka Mylliem, u Bah PT Passah ban jurip ia ka jaka ba thmu ban buh ia ka ophis jong ka Mawlai Block.
Ia u mawnongrim yn buh ha ka 18 tarik bad naduh katei ka sngi kan sa treikam noh shwa na iing dorbar haduh ban ioh ia ka iing ophis lajong. Ia ka ophis yn tei ha Lummawsing kaba ai sngewbha da ka Dorbar shnong Mawtawar kaba heh kumba 3 akar.
Mynta ka sngi la pynlong ia ka jingjurip ba la don lang ki nongmihkhmat ka Mawlai, u Bah Embhahlang B Syiemliem (MLA), u Bah PT Sawkmie (MDC), ki dkhot ka Mawlai Town Dorbar, ka JAC jong ki ar tylli ki sengbhalang na Mawlai bad kiwei nalor u BDO.
Ha kane ka sngi na ka liang u BDO u la pynsngewthuh ruh ba ka jingwan jong ka block ha Mawlai kam mut ba baroh ki scheme ne ki kam pynroi yn leh da ka block bathymmai, hynrei ki don ki scheme kum ka jingtrei 100 sngi lyngba ka NREGS kin dang hap iaid beit na ka Mylliem block namar mynta ki ne ki scheme ki la iaid marshiteng na ka Mylliem C&RD block.
Na ka liang u MLA, Bah Embhah u la pynsngewthuh ia ki paidbah da kaba ong ba wat la ka Mawlai ka la ioh ia ka block lajong hynrei bun ki kam yn dang hap ban leit sha ka Mylliem block, kum ki MLA scheme ba la dep ban sdang bad ka NREGS.
Ha kaba iadei bad ka surok ban poi sha katei ka ophis na ka liang u MLA u la iathuh ba u la iakren bad u engineer ka PWD ban kyntu ia u ban maramot bad pynbha ia ki lynti shwa ban plie ia ka ophis jong ka block.
U MLA u la kyntu ruh ia ka sorkar ban khmih bad ailad shwa ia ki samla ka thain ban ioh rung ha ki kam ba hap ha ka grade IV, kum ka dak ka jingburom ia ka jingai kylluid jong ka shnong ia ka jaka.