Na bynta ka liew niut ha Nonghali, poi sha ka thma ktien jong ki riew paidbah

Shillong: Ia ka jingsngap paidbah, kaba la thmu ban pynlong ha ka shnong Nonghali na ka bynta ban wanrah ia ka jaka bret niut, ha kane ka shnong la hap ban pynsangeh noh na ka jingkhang Surok ki nongshong shnong kiba don hapoh ka Synjuk Nongsynshar Shnong Par Umkhen (SNSPU).

Ki nongshongshnong kiba don hapoh ka Synjuk ki nongsynshar shnong ParUmkhen kiba kynthup ia ki 15 tylli ki dorbar, ki la ieng dangstep ha Surok ka ban leit sha shnong Nonghali ban khang lynti ia ki ophisar ki tnad sorkar ban leit sha ka Shnong Nonghali ban pynlong ia ka jingsngap paidbah, na ka bynta ban buh ia ka jaka theh niut ha kane ka shnong. Kane ka jingpakhang lynti ka la sdang naduh mynstep 7 baje haduh ka por janmied tad haduh ba ki bor district ki la pynbna ban pynsangeh noh ia ka jingsngap paidbah, hynrei tang katto katne por ka jingpynbna ban pynsangeh noh ia ka jingsngap paidbah, la don ka thma ktien hapdeng ki Nonghali bad ki Synjuk ki nongsynshar shnong ParUmkhen bad kane ka mih na ka jingbitar ba la shah pynsangeh noh ia ka jingsngap paidbah.Kane ka thma ktien ka la mih tang na ka bynta katto katne por namar ka jingtehlakam noh ki bor pulit kiba la wan sha kane ka jaka ban pahara.

Haba pynbna ki bor district ki la ong ba na ka Liang ka ophis district administration ki la wan naduh 8 baje mynstep, ban leit sha ka Shnong Nonghali na ka bynta ban pyniaid ia ka jingsngap paidbah, na ka bynta ka Waste Management project ha kane ka shnong, hynrei ki la shah khang noh ha kane ka jaka, wat la na ka bor district ki la pyrshang ban pynsngew ba ka jingthmu jong ka jingialang, hi ka long ban ailad ia kiba kyrshan bad kiba pyrshah ban pynsngew la ki jingsngew, khnang ban ioh shim ia ka rai, hynrei kim shym la ailad ia kata, bad namar ka jinglong jingman kam ilong ban iaid sha khmat bad ki la pan por ban pynbeit shwa ia ka kynrum kynram ha ki shnong ki thaw kumta na ka liang ki bor ki la shim noh ia ka rai ban pynsangeh noh shipor ia kane ka jingsngap paidbah.

Lah ban kdew hangne, ba na ka liang ki nongshong shnong ka Nonghali ki pdiang ia kane ka project jong ka Sorkar da kaba kdew ba kane ka project kan long ka lad ka lynti ban wanrah ia kiba bun ki kam pynroi kiba kum ka thain ka dang sahdien. Hynrei haba phai sha ki Synjuk ki nongshynshar shnong ParUmkhen pat ki pynpaw ia ka jingpyrshah kaba jur ia kane ka project, da kaba kdew ba kane ka project kan wanrah ia ka jingktah kaba jur ia ka wah Umkhen kaba long ka wah kaba kine ki shnong ki shaniah ha baroh ki liang.