Na bynta jongngi ki Khasi, hadien U Jisu, wan U Thomas Jones

Sohra, 24 Jylliew:
Ka Thomas Jones School of Mission and Evangelism ka la pynlong ia ka jingrakhe kynmaw burom ia ka lyngkhuh snem ba 172 ka jingwan iuh kjat u Rev Thomas Jones ha Sohra ha ka 22 tarik mynta u bnai.
Ha kane ka sngi ryngkat ka jingiadonlang ki nong ialam Balang bad nongialam Sengbhalang la pynlong ia ka jingrakhe da kaba pynlong ia ka jingiatai ne Panel Discussion halor ‘Ki kam ba u Thomas Jones u la leh ha Ri Khasi’.
Kiba la iashim bynta ha kane ka jingiatai ai jingmut, ki long u Rev Dr. ES Langstieh, Rev Dr PBM Basaiawmoit, u Tymmen Basan Dr DRL Nonglait bad u Bah Barkos Warjri, Addl Chief Secretary ka sorkar Meghalaya.
Kine ki khraw pyrkhat ki la iakren bad iatai halor u synñiang ba u Thomas Jones u la noh bad leh na ka bynta la jaidbynriew Khasi.
“Na ka bynta jong ngi ki Khasi khamtam ki Khristan, hadien jong U Jisu, wan u Thomas Jones”, la ong u Dr Langstieh, Principal barim ka Thomas Jones College, Jowai.
U la ong ruh ba ym pat don uwei pat u briew uban noh synñiang sha ka jaid bynriew Khasi kat u Thomas Jonesm da kaba pynkynmaw ia ki skul ba u la seng, ia ki kot ba u la thoh bad khamtam eh ia ki dak thoh ne ki jnit sohramjan jong ki Khasi.
U Pastor Basaiawmoit, Director ba nyngkong eh jong ka Thomas Jones School of Mission and Evangelism, u la pynkynmaw ia u synñian jong u Thomas Jones da kaba hikai thang shun ia ki briew da u dewiong, ka jinghikai kam misteri.
U Dr Nonglait; President ka Khasi Author Society, u la ong ba u synniang ba la noh da u Rev Thomas Jones lyngba ki kot Khasi ba nyngkong eh ba u la thoh, ki la long ka daw ba kongsan kaba la pynriewspah ia ka thoh ka pule Khasi kumne kumba ka long mynta.
U Bah Barkos pat u la ong ba kaei kaba phylla shaphang u Thomas Jones ka long ba u la sdang na I ei I ei ibarit bad ka iar bad roi pat hadien.
Hynrei kawei na ki mat kaba ka Panel Discussion, ba la pyniaid da u Rev W. Kharhujon, kadei halor ka mat ba u Thoas Jones u la ieng ban iada ia ka jingshah thombor bad shah banbeiñ ki Khasi ha ki bor sorkar phareng lyngba u Hari Inglish, u Captain uba la long ka daw ka jingphet noh u Thomas Jones na Sohra bad na Ri Khasi.
Ha kane ka sngi la ioh ruh ka Skit na ki samla pule barim ka Thomas Jones School of Mission and Evangelism, kaba la pyni ia ka jingwan poi u Thomas Jones hangne bad kumno u la hikai bad pyn nang pynstad ia ki briew.