Na Anjalee sha Motphran, mad jingeh ki paidbah na ka surok

Shillong,15K’lyngkot:
Na Anjalee ter-ter shaduh Motphran ki paid bah ki ia kynduh jingeh na ka jinglong jingman ki lynti ki syngkien ki surok bad ki jaboh kiba pynijli ia ka sor Shillong. Tang mar ia iaid na ki lynti iaid kjat na Anjalee ter ter shaduh them iewmawlong ( Parking lot) la iohi ia ki thliew ki syar jong ka lynti iaid kjat kaba sam lyngba shapoh ha kaba ki la don bun ngut napdeng ki riew paidbah kiba la khein khylliah ki kjat naba ki liat ha kitei ki thliew.
Tang mar ia lait na katei ka lynti iaid kjat , la iohi sa ki jaboh kiba rben bad kiba la tuid da ki um eit , kiba pynsma bad ki ba pynkylla pung ktieh ia ka them iew mawlong. Bun na ki paidbah ki la khnium halor ka jingbym shimkhia ki tnad ba dei peit ban weng ia katei ka jaboh kaba ia sait met. Iwei na ki longkmie iba die soh bad die wai dong hajan katei jaka ba tuid ki jabaoh i la ong ba i la shu shong ym banse ha katei ka jaka ‘ka jingsma ka long kaba la palat, mynstep lei ka la dap mam hynrei kham hadien ka la hiar suki ka um jaboh’ ong iwei i nongdie soh. I la ong ruh ba tang na ka jingi saitmet ia katei ka jaboh ym don nongthied sosh uwei ruh.
Hadien ba la ioh sngew ia ka jingkhnium ki paidbah na ka jaboh kaba la tuid ha katei ka jaka , u nongthohkhubor u la leit ban peit dalade hi bad la shem ba ha katei ka jaka ki paidbaha ki iaid lynti ryngkat ka jingset khmut set khmat ba jur palat ka jigsma. La iohi ba ki kynthei ki kyntiew shajrong ia ki jain sem jong ki ban kiar na katei ka jaboh.
Ka jingjynjar u paidbah kam shym la kut tang hangne, ha kaba tang shi kam ar kam tang mar ia lait ka pung ‘tieh ahor jong ka them iew mawlong , ki la mad biang sa ka lynti iaid ha ka surok bah jong ka iew.Ha katei ka surok kaba la paw sa tang da ki shyieng nar rod bun na ki paidbah ba iaid lynti ki la jynthut bad ki la mynsaw, ki nongshong dukan bad ki nongiah kali kiba pynieng kali hajan katei ak surok bah shuwa ban poi Motphran ki la iathuh ba da ki phew ngut ki paidbah ki la ur naba jynthut ia kitei ki nar-rod. ‘uwei lei u rangbah u la shu donbok , u nar rod u la sam lyngba ia ka juti jong u hynrei ym dei pat na ki kjat’ iathuh uwei u samla uba pynbeit ia ki kali ba ieng ha katei ka jaka.