Na 60 tylli ki konstitwensi, yn pynieng kyrtong ka BJP, ha ka elekshon 2023

Shillong:Ka Bharatiya Janata Party (BJP) Meghalaya, lyngba u president jong ka, u bah Ernest Mawrie u la iathuh ba ka parti hi, ha kane ka kynti ba mynta, kan pynieng 60 ngut ki kyrtong na ki 60 tylli ki kontitwensi ba don ha ka jylla.

U bah Mawrie, u la iathuh ruh ba ka parti haba iadei bad ka jingrai ia ki tiket ka parti hi, kam kular ban ai tiket iano iano, hynrei ki hap bud ryntih ia ki kyndon jong ka parti ha shwa ba kan ai tiket.
Haba kren pat ia kito ki kontitwensi, kiba ki don haduh ar ne lai ngut ki nong pan tiket, u bah Ernest Mawrie u la ong ba baroh kiba rung sha ka BJP, ki lah ban pan ia ka tiket na ka parti, hynrei katba ka parti kam pat rai, kim pat lang ban ong ba ki dei ki kyrtong ka BJP, na ki katto katne ki kontitwensi bad u la ong ruh, ba wat la u long U President jong ka parti um pat tip, la un ioh tiket ne em, na ka parti ban ia khun ia ka elekshon ban wan na West Shillong kontitwensi, namar ka parti kan hap ban bishar ban peit bniah bha halor kane ka bynta ha shwa ba kin shim rai.

U bah Ernest u la iathuh ba kumba lai ngut ki MLA ba mynta, kin wan iasoh sha ka parti ban ia khun ia ka elekshon ban wan na ka BJP bad kine ki MLA kin dei na ki parti kum ka NPP,TMC bad kiwei kiwei pat ki parti.

Haba kylli la u lah ne em ban iathuh, u bah Ernest u ong “Kiei kiei ki dang kloi palat ban ia kren mynta bad ngin sa ia peit pat kham hadien”.

Haba kylli haba iadei bad u Bernard Marak,u MDC jong ka BJP na South Tura konstitwensi, u bah Mawrie u la ong ba u Bernard u dang dei u wei na ki kyrtong ba pan tiket na ka parti bad lada u ioh ka tiket, u long uba la pynkhreh ban iakhun ia u Conrad Sangma na South Tura konstitwensi.

Haba phai pat sha ki mukotduma ba u Bernard Marak u la ngat,u bah Ernest u ong “Kiei kiei baroh kin dei beit ka jing shim rai jong ka ïingbishar haba iadei ban ai jamin ia u ne u nong ialam jong ka parti ha ka jylla”.