Na 561, sah sa 296 ki dukan kyiad, 500 klur duh khajna

Shillong, 17 Lber:

Ka sorkar jylla ka la duh khajna kumba T. 500 klur na ka jingkhang noh kumba 265 tylli ki dukan kyiad da ka hukum ka Supreme Court.

Ia kane la iathuh da u Myntri ka khajna ka jylla u Zenith M Sangma mynta ka sngi ha ing dorbar halor ka jingkylli jong u bah Dr Jemino Mawthoh.

U Zenith u la ong ba hadien ba hukum ka Supreme Court ia ki dukan kyiad ban khang hajan surokbah, jaka mane ha u snem 2014-15, la khang 265 tylli na ka 561 tylli ha baroh ka jylla.

U la ong ba ka jingkhang ia ki dukan kyaid ka la ktah jur ia ka iarong pisa ka jylla nalor ka jingkhang ia ka tih dewiong ka National Green Tribunal (NGT).

Katkum ka jingwanrah u Myntri ia ka jingdon ki dukan kyaid ka long ha East Khasi 61 tylli, West Khasi 10, South West Khasi 13, Ri Bhoi 31, East Jaintia Hills 35, West Jaintia Hills 26, East Garo Hills 07, West Garo Hills 53, South Garo Hills 13, North Garo Hills 18, South West Garo Hills 21 bad Sohra sub division 08 tylli. Ha u 2013-14 ka sorkar ka ioh khajna T.1626620757, ha 2014-15 ka ioh khajna T. 1511353697 bad ha u snem 2015-16 ka ioh lum khajna T.1700549408. Kaba sngew phylla ba u Myntri u la ong ba dei tang ha jaintia hills ba la ithuh ia ka kyiad ba shna hi ki briew katei ka thain.