Mynta yn tur Secreteriat & deng lama iong ka HANM

Shillong, 29 Naiwieng:
Ka Hynniewtrep Achik National Movement (HANM) Jaintia Hills District kham mynshuwa ka la pynbna ban tur sha Secretariat ha ka 30 tarik mynta u bnai, ban pynbor ia ka sorkar ba ka dei ban sei noh ia ka jingshisha kaba ki bor tohkit ki la lap ia ka jingjia kaba la jia ha Mookhep, ha kaba ar ngut ki mynsiem briew ki la iap, katba kiba bun ngut pat ki la mynsaw.
Haba ia kren mynta ka miet bad u President Rangbah katei ka seng u bah Lamphrang Kharbani u la iathuh ba katei ka jingpynbeit katei ka seng na Jaintia Hills kan iaid beit kumba la pynbna hynrei shuwa ia kane kan don ka jingiapyrkhat bad ka jingiakynduh lang ha madan Malki ha ka por mynstep bad ki dkhot katei ka seng kin mih na katei ka madan ha ka por 11:30 baje mynstep.
U bah Kharbani u la iathuh ba katei ka seng, kham mynshuwa ka la leit ban pan jingbit na u Deputy Commissioner ka East Khasi na ka bynta ban pynlong jingialang paidbah ha khmat khyrdop ka Main Secretariat; hynrei u la ong ba ki bor District kim shym la ai jingbit bad katei ka seng ka la kren shai ba kin tur beit sha Main Secretariat bad lada jia kaei kaei kaba sniew ne lada mih kino kino ki huri hura ki bor Distrik ki dei ban shim ia ka jingkitkhlieh. Hynrei u la ong ba mynhynnin ka sngi ha ka por 12 baje mynsngi ka la poi ka jingthoh na ki bor Distrik, ha kaba ki la ai jingbit ha Addl. Secretariat. Haduh mynta ym pat shym la thikna la katei ka seng kan hun beit ban pynlong jingialang paidbah tang ha Adl. Secretariat ne kan tur beit kumba la thmu sha Main Secretariat bad ka rai kan dei lashai ka step na Madan Malki. Utei u nongialam rangbah katei ka seng u la ong ruh ba ia katei ka ishu yn pyndep hi tang ki dkhot na ri lum Jaintia ki ban ia wan kumba 300 ngut eiei bad ym shym la khot satia ia kiba na kiwei pat ki jaka ne na Shillong. Na madan Malki sha Secretariat ne Addl. Secretariat u bah Kharbani u la ong ba ki dkhot katei ka seng kin deng lama iong kum ka dak ka jingpyrshah ia ka sorkar. Shuh shuh u la iathuh ba ha kine ki sngi ba la dep ki bor Distrik ka East Khasi Hills ki la ai jingshai sha katei ka seng ba ia ka jingtohkit ia ka jingjia ha Mookhep la pyndep bad la dep ban aiti sha ka sorkar jylla , hynrei ka sorkar haduh mynta ruh ka dang buhrieh ia ka kaiphod tohkit.