Mynta yn shah thngan u CEM barim

Shillong, 15 Jymmang:
Ka KHNAM  ka la kyrshan tylli ia ka jing shah thngan u working president ka party u Bah Adelbert Nongrum ban long naduh lashai ka sngi Saitjain ban pynbor ia ka sorkar ba kan pdiang noh ia ka Village Administration Bill.
U Bah Nongrum u la rai ban shah thngan haduh ban da iap lada ka sorkar kam pdiang noh ia ka VAB kaba la phah da ka KHADC.
 ”Ngi la rai ban kyrshan ia ka jingthmu shah thngan haban da iap u working president kaban sdang naduh lashai ka sngi Saitjain”, la ong u general secretary ka KHNAM u Bah Batkupar Wahlang.
U laong ba ka party kan nym don bynta ha ka jingshah thngan hynrei ka dei ka mon shimet jong u bah Nongrum kum u working president ka party.
“Ngin iadon lang kum ka jingai jingkyrshan ia u”, la ong u Bah Wahlang.
U Bah Wahlang u la ong ba uno uno ne kano kano ka dkhot ki lah ban iasoh bad u Bah Nongrum tangba kan shong ha ka mon jongki shimet.
Ha kajuh ka por, u Bah Wahlang u la kyntu ia ka sorkar jylla ba kan pdiang noh ia ka VAB  ban pynkut noh ia ka huri hura.