Shillong:Ka lympung Women’s League 2023 jong ka Shillong Sports Association kan ioh ban sdang noh ia ka semi final mynta ka sngi ha SSA Stadium First Ground, Polo ha kaba ki saw tylli ki kynhun kiba la lah ban iaid lyngba ki jingiakhun ha ka group stage kin ioh ban ia aireng ha kane ka semi final bad kine ki kynhun ki kynthup ia ka Mawlai SC kaba dei ka kynhun kaba dang bat ia ka nam lahduh, ka runners-up jong u snem 2022 ka Laitkor SC, Lumparing SC bad ka PFR Football Academy.
Ka kynhun kaba hakhmat na ka Group A ka Laitkor SC kan iakhun bad ka runners-up jong ka Group B ka Lumparing SC kaba yn sdang naduh ka por 2 baje janmiet. Ka jingialeh kaba bud naduh ka por 4 baje janmiet pat kin long hapdeng ka Mawlai SC kaba dei ka kynhun kaba hakhmat na ka Group B kan iakhun pyrshah ia ka runners-up jong ka Group A ka PFR Football Academy.
Ka Mawlai bad ka Laitkor ki dei ki kynhun kiba la lah ju wan hakhmat ha ka lympung iakhun jong ka Women’s League, katba ki shiphew tylli kiwei pat ki kynhun ki la pyni ka jingkiew ha ka rukom ialeh naduh ba sdang kane ka lympung myn ha ka 19 tarik u Jylliew 2023.
Napdeng kitei ki shiphew tylli ki kynhun, ka Lumparing ka dei kawei ka kynhun kaba don tang da ki samla lud hynrei ka kiew stet ha ka rukom ialeh hadien ba la iohi ba kam shym la shahrem ha ki san tylli ki jingiakhun bad khamtam ka la aireng tyngeh ia ka Mawlai ha kawei na ki jingiakhun kaba la shu kut tang ha ka jingiadraw da mar 3-3. Kumta ha kane ka knockout-round kan long kaba bha lehse ia ka Laitkor ba kan ym khein sting ha ka jingiakhun pyrshah bad ka Lum paring.
Haba phai pat sha ka Laitkor, ka dei tang kane ka kynhun kaba ioh ia ka jingjop kaba pura ha kane ka samoi lehkai jong kane ka lympung, hadien ba ka la ioh ia ka jingjop ha baroh san tylli ki jinglehkai na ki group bad duh tang shi kol ha ka jingialeh bad ka PFR Football Academy.
Phi don ban ong eiei?