Mynta yn rai ki 15lak ngut, ia 2 ki MP na Shillong & Tura

Shillong, 8 Iaiong:
Lashai ka sngi ka 9 tarik Iaiong, ka dei ka sngi ba ki paidbah ka jylla kiba don 15 lak tam kin jied ia ki ar ngut ki MP napdeng kiba bun ki kyrtong. Uwei na Shillong bad uwei na Tura.
Shiphew ngut ki kyrtong kiba la ieng ha kane ka kynti kynthup 2 ngut na Tura Parliamentary constituency bad 8 ngut na Shillong Parliamentary constituency.
Ka seng lehnoh ka Hynniewtrep National Liberation Council (HNLC) ka la khot pakhang shnong ba 12 kynta ha Khasi bad Jaintia Hills ha kane ka sngi Balang naduh ka por 5 baje mynstep haduh 5 baje janmiet.
Saw phew pyrtong ki bor shipai la pyndon kam ban pahara ha kane ka elekshon ha ka jylla khnang ban wanrah ia ka elekshon kaba beit bad kaba rynrih.
Namar kane ka jing khot pakhang shnong ka HNLC, ki bor pahara ki la pyrkhing bha ha ka jylla bad khamtam ha ki thain khappud.
U Acting Chief Secretary ka jylla u Bah PBO Warjri u la kyntu ia ki paidbah ban nym tieng ia ka pakhang shnong ka HNLC bad ki dei ban iamih paidbah ban leit thep ia ki vote jongki.
Ki don 2562 tylli ki jaka thep vote ha ka jylla ha ki 11 tylli ki district ha ka jylla jong ki ar tylli ki parliamentary constituency.
Palat 9 lak ngut kin jied ha ki 1633 tylli ki jaka thep vote ba hap Shillong parliamentary bad 5 lak ngut tam kin jied ha ki 929 tylli ki jaka thep vote jong ka Tura parliamentary constituency.
Na ka bynta ka Shillong ki don 8 ngut ki kyrtong kynthup u kyrtong ka Congress uba dei u MP Bah Vincent H Pala, kyrtong ka United Democratic Party (UDP) Bah Paul Lyngdoh, kyrtong ka Bhartiya Janata Party (BJP) Bah Shibun Lyngdoh, kyrtong ka Aam Admi Party (AAP) Bah A Kharshiing, kyrtong ka CPI Bah Richard Shabong bad lai ngut ki kyrtong shimet kynthup u Pastor PBM Basaiawmoit, Bah Denis Siangshai bad ka kong Ivory Shylla.
Ha Tura ka jingiakhun kan long hapdeng u kyrtong ka Congress u Daryl William Cherran Momin, bad u Purno Agitok Sangma na ka National People’s Party (NPP).
Haduh 10248 ngut ki nongtrei sorkar la pyndonkam ha kaban pyniaid ia ka elekshon ha ki 2562 tylli ki jaka thep vote.
Haduh 3300 tylli ki electronic voting machines (EVMs) la pyndonkam ban thep vote.
Ki 343 tylli ki jaka thep vote la niew kum kiba don jingma bha bad 375 ngut kiba lah ban mih hura hura malu mala.