Shillong: Hynnin ka miet, la mynjur da ka Lok Sabbha ia ka ain Citizenship Amendment Bill (CAB) bad ia katei ka ain, la iathuh ba yn leit rah mynta ka sngi ha Rajya Sabbha.
Ka Rajya Sabbha, ka don 245 ngut ki dkhot, hynrei ki dkhot kiba don mynta ki long 238ngut baroh bad ka BJP, ka donkam 120ngut ki ban kyrshan ia katei ka bill bad ka BJP nalade ka don 83ngut ki dkhot, katba ki paralok jongka ha ka National Democratic Alliance (NDA) ki don 94ngut. Nangta ki don 12ngut ki nominate MP ha Rajya Sabbha bad ka BJP, ka kyrmen, ba kan ioh 11ngut, hynrei hangtei ruh ka dang duna sa 15ngut bad hangtei kan long ka jingeh kaba khraw, ban ia khein, naei ba kin mih kitei ki 120ngut ki ban kyrshan ia katei ka seng, ban pynlong ain ia ka Citizenship Amendment Bill (CAB).
Ka BJP, ka dang thawlad tyngeh mynta ban ioh ia ki MP jong ka seng AIADMK kiba don 11ngut bad nangta wat ki dkhot jong ka Biju Janata Dal kiba don 7ngut.
Ka Congress ha kawei ka liang, ka ban pyrshah ia katei ka ain CAB, ka don nalade 46ngut ki dkhot bad ka hap ban ioh ia ka jingkyrshan radbah jong ki paralok jongka, kum ka Trinamool Congress, ka DMK, NCP bad kiwei de ki seng sain pyrthei.
Na ka liang jong ka sorkar BJP, ha ka jingialam U Amit Shah, kin thaw ia kino kino ki lad ban pynurlong ba ka ain CAB, kan ioh ia ka jing mynjur jong ka Rajya Sabbha lashai ka sngi ruh.
Phi don ban ong eiei?