Mynta yn pyndep ia ka met u pulit ba shah siat iap ha ki GNLA

Shillong, 02 Risaw:
Ia ka met iap jong u pulit ba shah siat iap ha ki lehnoh GNLA ha kane ka sngi Balang u Bah Helping Stone Nongkseh. Ia ka met jong u Bah Nongkseh yn pyndep lashai ka sngi ha shnong jongu ha Nongshangu kaba don hajan ka Umsning ka Ri-Bhoi district.
Na ka liang u commandant Bah Hubert G Lyngdoh u la ong ba ka jingleit ontep ia une u pulit kan long lashai ha kaba yn don ka jingleh burom na ki pulit.
U la iathuh ba u Bah Nongkseh u dang shu pyniasoh sha ka kam pulit ha u bnai Naitung bad la phah sha East Garo Hills.
“Na ka liang jong ngi ngi thoh sha ka sorkar ba kan leh ia kaba donkam ba kan ai jingiarap sha kiba haiing hasem jong une u pulit ba la lenlade”, la ong u Bah Lyngdoh.
Lah ban kdew ba u Bah Nongkseh bad u Kanton Dalu jong ka 6th MLP Battalion ki la khlad noh hadien ba la shah hiar thma kynsan ha ki dkhot ka GNLA ha ka sngi Balang por 3 baje janmiet katba ki dang wanphai da ka ar shan na iew ha Williamnagar, ka East Garo Hills.