Mynta yn plie pule saian jong ka Nongstoin College

Nongstoiñ, 29 Jylliew:
Ka Nongstoiñ College kaba don hapoh ka shnong Nongpyndeng Nongstoiñ West Khasi Hills District, kan plie noh ia ka kyrdan pule saian (Science Stream) ha katei ka College.
La sdang ban seng ha u snem 1978 hapoh iing wai, hynrei mynta katei ka Kolej, ka la long kawei na ki college kaba la paw bha hapoh ka thain bad kaba la don ruh ia la ka jong ka iing bad ka jingioh pdiang kaba khraw bad kaba kongsan jong katei ka Kolej, ka dei ia ka kyrdan B+ lyngba ka jingjurip jong ka NAAC jong ka UGC.
Katei ka College kan plie noh ia ka kyrdan pule saian, ha ka 30 tarik u Jylliew ha kaba yn wan ban plie da U Bah D Jyndiang, MLA jong ka Nongstoiñ ryngkat u Bah Ardent Basawiamoit MLA jong ka Nongkrem.
Na ka liang jong ka Nongstoin Youth Welfare Organisation (NYWO) kaba dei ruh ka Sponsoring Body jong ka Nongstoin College, ha ka sngi ba ar jong ka taiew ka la ioh ban pynthymmai noh ia ki nongkitkam ha kaba u President barim jong ka NYWO, U Bah J.K. Dewsaw uba la bat ia ka kam President mynta la 30 tylli ki snem u la ioh ban aiti noh ia katei ka kam sha u Dr. Lumbor Mawsor ba un long kum u President ba thymmai jong ka Sponsoring Body jong ka College.
Ha katei ka sngi nalor U Dr.Lumbor la ioh ruh ban jied ia u Bah Playing Dkhar kum u Vice President ka NYWO, u Wanllamkupar Marwein General Secretary, Asst. Secretary Bah Donborlin Dkhar, Treasurer Kong Ephoda Dkhar, Adviser Bah Jylliewsing Khardewsaw, Auditors Bah C.P.Byrsat bad u Bah Maitlynti Lyngkhoi ryngkat ki 11 ngut ki Executive member.
Na ka liang jong u Dr. Lumbor Mawsor u President ba thymmai haba ai jingkren ha katei ka sngi u la pynpaw iaka jingsngew kmen kaba khraw ha kaba ki dkhot jong ka NYWO ki la ibit ia u ban tynrong ia katei ka kam kaba khia bad kaba long kawei na ki kam kaba donburom ban kyntiew iaka College ha kiwei pat ki kyrdan kiba ia ryngkat bad ki college ha kane ka Ri.
Shuh shuh u Dr. Mawsor u la ai mynsiem ruh ia baroh ki dkhot bad u tyrwa ruh iaka jingiatrei lang jong baroh ki dkhot, u la pynkynmaw ruh iaka jingeh jong ki dkhot ka NYWO ha ki snem 1978 ter ter ha ka por ba sdang ia katei ka college ha kaba u kpa jong u ruh u la long uwei na ki dkhot ba shitrhem ban kyntiew ia katei ka college lyngba ka NYWO, kumta ia kiei kiei kiba ki longshuwa kiba la leit noh ki la seng ngi dei ban kyntiew iaka ha ka lynti kaba dei.
“Wat la ka College kala don iaka kyrdan kaba biang hynrei ban wanrah ia ka kam pynroi hapoh ka college ka donkam ban don ka jingiatreilang ryngkat ryngkat bad ka Management ka sponsoring body kumjuh bad ki nongtrei kiba kynthup naduh u Principal, ki nonghikai, ki khynnah pule, ki kmie ki kpa bad kiwei kiwei khnang ban nang pyndap ia kiba bun ki jingduna” ong u Dr. Mawsor.