Mynta yn mih UDP U Bah Shylla, lah ban iakhun MLA na ka NPP

Shillong, 07 Jylliew:
U MDC ka UDP na Nongkrem u Bah Hispreaching Son Shylla u lah ban iakhun noh ha ka elekshon MLA ban wan na ka seng NPP. Katkum ka tyllong khubor ba la iohlum, la iathuh ba u Bah Shylla u lah ban mih noh na ka UDP hadien ba u la rai ban iakhun beit ia kane ka elekshon MLA kaban wan na Nongkrem.
Ka NPP ka dei ka la don jingkyrmen bha ban ioh bun ngut ki MLA na Garo Hills hapoh ka jingialam jong u MP u Conrad K Sangma uba dei ruh u khun jong u Purno A Sangma, bam kwai ha duwar u Blei.
Watla ym pat thikna bha, hynrei na ka tyllong khubor ba la iohlum, la iathuh ba ka jingiakren bad ki nongialam ka NPP ka dang iaid mynta bad lah ban pynbna paidbah kham hadien halor.
Kham mynshwa, u Bah Shylla u la pynbna ha kawei ka kot khubor, ba u la rai ban mih madan ha kane ka elekshon wat ha ka jingshisha, u dei uwei na ki nongialap ban pyniatylli ki seng riewlum ha kane ka kynti bad u la pynbna ruh ban lenlade halor kane.
Ka HSPDP bad ka UDP ki la poi sha ka jingiasngewthuh jingmut lang ha kane ka elekshon bad ki la rai ban iakhun lang ha kane ka elekshon 2018.
Hynrei kham hadien, u Bah Shylla u la pynpaw ba um sngew iahap ia kaei kaba ka UDP bad ka HSPDP ki la leh bad ka jingiatreilang jongki kam long kaba pura namar ba kiwei ki seng riewlum kum ka KHNAM, bad wat ka PDF kaba dang shu mih shen, khlem khot lang ha kajuh ka rynsan.
Lashai ka sngi ka 8tarik u Jylliew u Bah HS Shylla u la buh por ban iakren bad ki nongthoh khubor bad la sngewthuh ba u lah ban pynbna ban mih noh na ka UDP.