Shillong: Ka kynhun United Democratic Alliance (UDA) mynta ka sngi, kin leit pariet (parade) ha ïing u Lat ha Raj Bhavan, Shillong ban kam ba kila don ha ka jingbun paid ban thaw ia ka Executive Committee (EC) ha Khasi Hills District Council (KHADC).
Ka UDA ka la kam ba ka don 15 ngut ki MDC ha ka ïing kaba 29 ngut katba ka United Democratic Forum (UDF), ka la duna paid sha ka 14 ngut kynthup ia u chairman.
Ka UDA ka la kam ba ka la don 15 ngut ki MDC hadien ba u MDC ka Congress na Mairang u bah Batskhem Ryntathiang ula phet noh na ka UDF ban wan ai ka jingkyrshan ia ka UDA.
Ka drama iaknieh shuki ha KHADC kala neh kumba ar taiew mynta hadien ba u CEM barim bah Teinwel Dkhar ula shah pynkhyllem ha ka liangpyrshah da ka jingshet u chairman u bah Pynshngain N Syiem ha ka por ba ki iakhaid ha ka jingiatynjuh bor ha ïing dorbar.
“Ngin leit aiti ia ka shithi ha u Lat u Tathagata Roy ha ka sngi Nyngkong, ba ngi la don ha ka jingbun paid”, la ong u bah Pyniaid Sing Syiem na ka NPP uba long u Dy. CEM barim ka KHADC.
Ha kajuh ka por, ula kam ba ki dang don sa ar ngut ki MDC na ka UDF kiba la don ka mynsiem ban wan ai jingkyrshan lang ia ka UDA tangba um pat pynthikna ia ki kyrteng jongki.
Haba kylli ba u bah Latiplang Kharkongor u nongialam ka UDF, ula kam ba ki don pat ki MDC na ka UDA kiba thmu ban ai jingkyrshan sha ka UDF, u bah Pyniaid ula ong ba ka dei tang ka jingkam ban pynkulmar jingmut. “Baroh 14 ngut ki MDC ka UDA ki skhem khlem khih naduh ba la khyllem ka EC namar ki kwah ban ioh ia ka EC kaba skhem”, la ong bah Pyniaid.
U bah Pyniaid ula kyntait ruh ban donkam khot dorbar ban iatynjuh bor namar ba haduh mynta, ka KHADC kam pat don u CEM ba ithuh da ka sorkar.
Phi don ban ong eiei?