Mynta yn kynther ki liangpyrshah ia ka sorkar halor ka ILP Sdang ka dorbar Jylla

Shillong, 3 Risaw:
Ka dorbar synrai jong ka iing dorbar thawain ka jylla kan sdang lashai ka sngi bad la khmih lynti ba kan don ka jingther na ka liang ki dkhot ka liangpyrshah ia ka sorkar halor ka jingdawa ban pyntreikam ia ka Inner Line Permit (ILP).
Ka liangpyrshah MPF ka la rai ban dawa ban wanrah da ka Adjournment Motion halor ka jingiakren ban pyntreikam ia ka ILP ha kane ka sngi long dorbar ba nyngkong.
“Ngi kyrmen ba u Lamphang u Abu Taher Mondal un ai lad ia ka Adjournment motion,” la ong u nongaiktien ka Meghalaya People’s Front (MPF) u Bah Paul Lyngdoh.
U la ong ba ym pat shim ia kano kano ka rai kumno ban leh, lada u Lamphang um ai lad ban wanrah da ka Adjournment motion.
“Ngin iakynduh lashai mynstep shwa ban leit sha ka iing dorbar. Ngin rai kumno ban leh lada u Lamphang um ailad ia ka Adjournment motion”, la ong u Bah Paul.
U nongaiktien ka MPF u la ong ba kin wanrah ruh ia ka mat kaba iadei bad ka ktien Khasi ban dawa pynrung hapoh ka Eight Scheduled ka riti synshar ka ri.
“Ngin rah ia ka jingsynjor ka suk ka sain ha ka thain Garo Hills, ngin rah ia ka jingshah ban bein ki nonghikai nalor ka jingsniew palat ki surok ha kane ka jylla”, la ong u Bah Paul.
Ha kajuh ka por, kin rah ruh ia ka kaiphod jong ka laitphet phatok na Shillong.
Ka kaiphod jong ka jinglait phet ki koidi na Shillong District Jail ka la jia ha u snem 2009 ha kaba u Fullmoon Dhar u la shah siat iap noh.
Na ka liang ka sorkar ka la buh ba ha kane ka sngi dorbar ba nyngkong, u Lamphang un pynbna ia ka kaiphod jong ka Business Advisory Committee, ia ki kyrteng ban thung ha ka panel, nalor ban wanrah ia ki ordinace, ki jingpynbna, ki kaiphod bad ki rule.
Ka dorbar kan bteng haduh ka sngi Nyngkong ka 7 tarik ban pyndep ia ki kam ka sorkar.
Ia ki motion bad kiwei la buh ha ka 8 tarik, kynthup ban wanrah ia ka bill bad kiwei ki kam ka sorkar.
Ha ka 21 tarik, yn wan kren u President ka ri u Pranab Mukherjee ha kane ka iing dorbar ka jylla.