Mynta yn kut ka tamasa bam tynrai ka pyrthei ha Mawphlang

Shillong, 06 Naiwieng:
Ka Tamasa Bam Tynrai ka pyrthei ne ka International Terra Madre (ITM) kan kut noh lashai ka sngi ka 7 tarik Naiwieng ha Law Kyntang Mawphlang hadien san sngi ba la sdang ia ka naduh ka 3 tarik Naiwieng.
Ha kane ka tamasa bam tynrai la wan iashim bynta 600 spah tylli ki jaitbynriew kiba sah ha ki 58 tylli ki ri ka pyrthei, kiba wanrah ruh ia ki jait jingbam tynrai jongki katkum ka jinglong jongki.
Ki briew na kylleng ki ri ka pyrthei naduh Amerika, Italy, Sweden, Mongolia, Sudan bad kiwei ki la wan ban iasam ia ki jingtip ka jinglong jongki bad kumjuh ban ioh jingtip ia ka jinglong ki jaitbynriew na kane ka ri khamtam ki riewlum kiba sah ha kane ka Dong Mihngi bad ha kiwei ki bynta ka ri India.Ha India, kiba bun eh ki jaitbynriew ki don ha kane ka Dong Mihngi ka India ha kaba tang ha Meghalaya ki don bun bha kynthup Khasi, Garo kiba kham kongsan nalor kiwei pat.Ka North East Slow Food Agrobiodiversity Society (NESFAS) ba la khlieh da u Bah Phrang Roy ka la dei ka nongialam lynti ban pynlong ia kane ka tamasa bam tynrai ha kane ka kynti. Kum kane ka tamasa la pynlong ruh sha kylleng ki jaka jong ka pyrthei ha kaba ki jaitbynriew bapher bapher kiba sah ha ki ri bapher bapher kane ka sla pyrthei ki la wan ban iashim bynta.Ka tamasa bam tynrai kaba ai kyrteng ka Mei Ramew ka long shi bynta ban kyntiew ruh ia ki briew jong kane ka jaka ha ka liang ka sap ban shna jingbam bad ban kyntiew ha ka rep ka riang jongki.La khmih lynti ba ka Law Kyntang Mawphlang lashai kan shlei bha ki briew ban leit sha kane ka tamasa kaba dei ka sngi pynkut.