Shillong: Mynta ka sngi, ka 11 tarik Iaiong, ki paidbah nongthep vote ka jylla kiba don 19 lak ngut tam kin jied ia ki ar ngut ki kyrtong ban phah sha ka Lok Sabha napdeng kiba bun ki rang iakhun.
Kin jied uwei na Shillong bad uwei na Tura parliamentary constituency.
Ha kane ka kynti, ki don 19,11,369 ngut ki nongjied ne nongthep vote haduh u Kyllalyngkot ba la dep mynta u snem. Na kine, 11,95,662 ki dei ha Shillong Parliamentary constituency katba 7,15,07 ngut na Tura Parliamentary constituency. Kane ka mut ba ka la don ka jingkiew kaba 40 hajar tam na u snem ba la dep, kaba long 18,92,716 ngut.
Ki don baroh 3167 tylli ki jaka thep vote ne polling station ha baroh kawei ka jyllla.
Ha Shillong kiba iakhun ki long u Dr Jemino Mawthoh ha ka shap ka Bom na ka kynhun ka Meghalaya Democratic Alliance (MDA), u Bah Vincent H Pala na ka Congress, u bah Sanbor Shullai na ka BJP, katba u bah THS Bonney , bah Samuel Hashah bad u bah Phira Rani kum ki kyrtong shimet.
Na Tura kiba iakhun ki long ka Agatha K Sangma na ka shap ka NPP kaba iakhun na ka kynhun MDA, u Mukul Sangma na ka Congress bad u Rikman Momin na ka BJP.
Phi don ban ong eiei?