Mynta yn iateh ktien U Bah Antonio bad ka BJP

Shillong, 04 Naiwieng:
Ka BJP kaba khlem don MDC ha KHADC, mynta kan sa don u MDC BJP ha ka sien ba nyngkong ha ka khana ka sain pyrthei ha KHADC bad kata, ka long ba u MDC ka Laitumkhrah uba phet noh na ka Congress, u bah Neil Antonio War un pynlong ka jingiateh ktien bad ka BJP lashai ka sngi bad uwei u MDC na Garo Hills.
U Bah Antonio bad u MDC shimet na GHADC kin sa shah pdiang burom lashai ka sngi ha ka BJP kaban long ha Shillong Club por janmiet.
Haba pynthikna ia kane, u President ka BJP u Bah Shibun Lyngdoh u la iathuh ba ka jingpynkhreh ka long ban pdiang ia u Bah Antonio bad kiwei ki riew rangbah hynrei ki lah ban wan ruh sa kiwei ki MDC ban pyniasoh lashai.
“Ngi la pynkhreh ban pdiang ia u Bah Antonio bad kiwei ki don ba dang iakren bad ki nongialam ka party jong ngi”, la ong u Bah Shibun.
Kumjuh u General Secretary ka BJP u Bah David Kharsati u la ong ba kine ar ngut ki la pynthikna ban wan iasoh bad ka BJP, bad ka party kan sa pynlong ia ka jingpdiang burom ia ki lashai.
“Kiba la thikna ban shah pdiang lashai ki long u Bah Antonio bad uwei na Garo Hills”, la ong u Bah David.
U la ong ha ka jingshisha, dang don bun ki MDC kiba thmu ban wan iasoh bad ka BJP hynrei ym pat kwah ban pynlait kyrteng namar ba ka jingiakren ka dang iaid shaid shaid. Khlem pep, ka jingwan iasoh ki MDC khamtam ha kane ka por ba ka Congress ka la iapait, kan pynkhlain ia ka BJP ha kane ka jylla kaba bun ki paidbad riewngeit Khristan.
Haba kylli ki dang don shuh ne em ki ban wan iasoh bad kaparty, u Bah David u la ong, “Haduh ban da poi ka 3 baje lashai, ki lah ban wan pynban haduh 4-5 ngut ruh”,.
Kane ka jingwan iasoh jongki, ka la long ka lyer ban pyrsad mynsiem shuh shuh ia kane ka party ka bym don MDC satia ha KHADC bad JHADC.
U Bah Antonio u la phet noh na ka seng Congress ha une u bnai ba la dep hadien ba ka party ka la sospon noh ia u Bah Pynshngain N Syiem na ka party.
Nalor u Bah Antonio, kiwei pat ki MDC ka Congress ba phet noh, ki long u Bah Hadrian Lyngdoh na Mawkyrwat, Bah Albinus Lyngdoh na Umroi, Bah Victor Rani na Jirang bad u Bah Banteidor Lyngdoh na Mawkynrew.