Mynta yn ialap elekshon U Conrad, na ba sdang U Purno

Shillong, 24 Iaiong:
U Conrad Sangma u kyrtong MP ka NPP u ban ia khun ha ka elekshon shiteng samoi ka ban long ha ka 16 tarik u jymmang,2016 na Tura konstitwensi un sdang ia ka jingialap elekshon jong u lashai ka sngi ka 25 tarik u iaiong na Adokgre, East Garo Hills.
Ki nongialam ka seng NPP ha ka jingpyntip jong ki sha u Rupang ki la ong ba ka Adokgre ka dei ka jaka kaba u Purno A Sangma u ju jied kyrpang kum ka jaka ba nyngkong eh ha ka jingiaid ialap elekshon jong u, naba u kham noh mynsiem ia katei ka shnong. Ki la ong ba u Purno A Sangma u ju sdang beit na katei ka jaka ban ialap elekshon bad kumne u ju leh ha ka jingim jong u ha ka saiñpyrthei.
Kumba ju leh u kpa jong u la iathuh ba u Conrad ruh un bud ia ki dienjat jong u da kaba sdang shuwa na katei ka shnong na Adokgre bad la iathuh ba ka jingsdang ialap elekshon u Conrad na Adokgre ruh kan long kum ka jingkynmaw burom kyrpang eh ia u kpa jong u uba la khlad noh.