Mynta yn iakynduh kyrkieh ki MDC Congress, ka KHADC Bun kiba ujor ba huri hura ka tamasa Mawphlang

Shillong, 27 Risaw:
La ioh khubor, ba lashai ka sngi, kan don ka jingiakynduh ba kyrkieh jong ki MDC jong ka seng Congress ha Khasi District Council bad hadien jong kata, kan don ruh ka jing ia kynduh jong ka kynhun iasynrop jong ki MDC ka Council, ka KHUDA, na ka bynta ban iakren halor ka kynrum kynram jong ka jingrakhe ia ka tamasa mawbynna, kaba dang shu kut shen hynnin ka sngi ha Mawphlang bad ha kajuh ka por, kan don ruh ka jingpynkhreh na bynta ka dorbar jong ka Council, ka ban sdang naduh ka 29tarik Risaw 2013.
Ki lad khubor, ba la ioh lum mynta ka sngi, ki iathuh ba ka jingpynlong ia ka tamasa mawbynnaw ha Mawphlang, kam shym la long satia kaba iaid beit iaid ryntih bad ka dei na katei ka daw, ba kiba bun ki MDC jong ka seng Congress, kim shym la poi ban ia shim bynta lang, ba kynthup ia u lamphang dorbar, Bah Fabian Lyngdoh, U bah HDR Lyngdoh uba dei U MDC jong ka Sohiong, um shym la leit ban shim bynta nalor kiwei kiwei.
Ka jingkynthoh na kiba bun ki MDC Congress, ka long ba ha katei ka jingrakhe, la iohi, ba ka KHADC, kam shym la paw kyrteng eiei satia, hynrei, la shu aiti lut ia ka kam, ha ka Khasi Heritage Conservation Forum(KHCF)ha kaba U Secretery jong ka Forum, um shym la dei satia u ophisar jong ka Council bad ba U Chairman jongka, um dei satia U Executive Member jong ka Council.