Shillong: Ka Shillong Lajong kan iakhun ia ka Indian Arrows mynta ka sngi ha ka lumpung Hero I-League 2017/18 ha madan Barabati Stadium ha Cuttack por 5PM. Ia kane ka jingialehkai yn pyni live ha Star Sports 3.
Ka Lajong ka la shah pynliem ha ka East Bengal da 3-1 kol ha ka jingiakhun ha nongbah Shillong bad shwa ia kane, ka la pynliem ia ka Aizawl.
Ha ka jingiakhun ba la dep mynshem snem, ka Lajong ka la pynliem ia ka Indian Arrows da 1-0.
Ka Indian Arrow ka la shah rem ha ka Chennai City FC ha ka jingiakhun ba dang shu dep shen.
U coach ka Lajong u bah Alison Kharsyntiew u la ong ba ka kynhun ka la kham khlain mynta namar ba ka la iasoi biang sa ar ngut ki nongialehkai ba kynthup ia u Meban Wahlang na Shillong bad u Nabin Rabha na Assam.
Katba u coach ka Indian Arrows u Floyd Pinto u la ong ba ki la oeit bha ia ka jingialehkai ka Lajong ha kine ki ar tylli ki jingialehkai bad ki dei kiba shankhmat bha ka rukom ialehkai jongki.
Baroh ar ngut kine ki coach ki la kyrmen ba ki ioh ia ka jingjop ha ka jingiakhun lashai ka sngi.