Shillong: Ka Shillong Lajong kan iakhun mynta ka sngi pyrshah ia ka Churchill Brothers FC na Goa ha madan JN Stadium, Polo, Shillong. Kane ka dei ka sien kaba hynniew ia ka Shillong Lajong ba kan iakhun ia kane ka lumpung i-league ha la iing lajong. Ka jingialehkai kan long ha ka por 5PM.
Ia ki tiket lah ban ioh na Mobile Centre ha Khyndai Lad bad na ka SSA Counter ha madan Polo.
Ha ka jingiakhun ba la dep ha la ing, ka Lajong ka la shah pynliem da 0-1 ha ka Real Kashmir FC katba ka la lah ban pynliem ia ka Minerva Punjab FC da 0-1 ha ka jingialehkai shabar na la iing.
Ha ka jingiakhun ba la dep ha Goa, ka Churchill Brothers ka la pynliem ia ka Lajong da 4-2.
Haba kren myn hynnin ka sngi, u coach ka Lajong u bah Alison Kharsyntiew u la iaroh ia ka jinglehkai bha ki nongialehkai kaba la dep bad kyrmen ba lashai kan sa ioh ban khur pura ia ka point.
“Ki nongialehkai ki la ialehkai bha ha kine ki ar tylli ki jingialehkai ba la dep bad ngin pynneh ia kane ka jingialehkai”, la ong u bah Alison.
Ha ka jingialehkai lashai, u Rakesh Pradhan un wan phai bad ka kynhun hadien ba u la shitom ha kine ki sngi.
Ha kawei ka liang, u coach ka Churchill u Petre Gigiu u la ong ba ka jingialehkai lashai kan long kaba jwat bha namar ba ka Lajong ka kwah ban khur ia ka nam jop hynrei na ka liang jongki, kin nym pyndem.
“Ka long kaba sngew lyngngoh ban iohi ba ka Lajong ka don sha trai ka miej khein point. Haba nga iohi ia ka jingialehkai jongki, ki la ialehkai bha. Hooid, ngi la jop ia ki 4-2 kol hynrei ki ialehkai bha”, ula ong.