Mynta yn hiar khyndew u nongialam dei kmie masi ha kad liengsuin Umroi

Umroi:Ki sengbhalang kynthup ka Khasi Students Union (KSU, ka Hynniewtrep Youth Council (HYC), ka Hynniewtrep Integrated Territorial Organization (HITO), ki la hiar bad ap khrui hynnin ka sngi, habar ka kad liengsuin ka Umroi ban pyrshah ia ka jingthmu jong u heh ka seng ki Hindu u Shankaracharya Avimukteshwarandah.
Hadien ba ki la ap naduh 11baje mynstep haduh 1:30 nohsngi, la ioh jingtip ba um wan shuh hynnin ka sngi, bad u lah ban wan noh mynta ka sngi.

U President ka HYC u bah Roykupar Synrem ula ong ba ka seng kan ym ailad ban wan iuhkjat ka kynhun kaba thmu ban pynbna ia ka masi kum ka kmie bad ban khang bam doh masi.
Ula ong ba seng kan leit ban bud shano shano ka jaka kaba ki thmu ban iaid hangne ha Meghalaya bad kan beh krad bad kam shah ba kin wan batai ia ka bam ka dih jong ka jaitbynriew.

Katba u General Secretary ka KSU North Khasi Hills u samla James Mawphniang ula ong ba ka seng kan ym ailad ban wan tuklar ki briew nabar ia ka bam ka dih, ka riam ka beit bad ka kup ka sem jong ka jaitbynriew. Ula ong ba lada u wan na suin ne na ryngkew ne na um ruh, ka seng kan pyrshah beit.
Kumjuh u General Secretary ka HITO Shillong City u bah Balajied Jyrwa ula ong ba ka HITO kan wan biang lashai ruh sha kane ka kad liengsuin namar ba katkum ka jingtip, u lah ban wan lashai u heh ka kynhun ban khang bam doh masi.
Ula ong ba ka seng kan nym ailad satia ia ki briew kiba wanrah ia ka rukom ka bym iahap ban pynbna ia ka masi kum ka kmie bad ban khang bam doh.
Ha kawei ka liang, u Shailendra Yogiraj Sarkar uba dei u National Media Coordinator- Jagadguru Shankaracharya Ji Maharaj ula pynthikna ba u Swami Avimukteshwaranand Saraswati un hiar da ka liengsuin ha Umroi mynta ka sngi, ka 28 tarik Nailur 2024 ha ka por 12 baje mynsngi.
Ha kane ka jingwan iuhkjat, u Swami un sieh lama masi bad ban dawa ban pyllong ia ka masi kum ka kmie ka ri India, ha kaba yn khang ban bam ban pyniap ia ka.

Lah ban kdew ba ki Sengbhalang bapher bapher kila pynkhreh ban pyrshah jur ia kane ka jingwan u Swami lashai bad kila byrthen ban ym ailad satia ba un sieh lama ne pyllong kano kano ka prokram.
U Chairman ki san tylli ki dorbar shnong ka Umroi, u bah Pyllnwanbor Sylliang ula wan sha kad liengsuin ha Umroi hadien ba la ioh jingtip ba ki Sengbhalang kila tur sha katei ka jaka.
U bah Pynwanbor ula ong ba ka jingwan jongu sha katei ka jaka, ka long ban pynthikna ba kan ym don kano kano ka jingpynthut ia ka shongsuk shongsaiñ bad kan ym don ka jingpynwit ia ka leit ka wan jong ki nongleit nongwan.
Ha kajuh ka por, ula pyrshah jur ia ka jingthmu ban pyllong ia ka masi kum ka kmie bad ula ong ba ka masi ka dei ka mrad bad ym lah ban pdiang ban long kum ka kmie.