Mynta yn bishar, ka MPCC; ia ki kyrtong MP na Shillong bad Tura

Shillong, 2 Rymphang:
Ka Election Committee ka MPCC kaba don 10 ngut ki dkhot kan shong lasai ka sngi Nyngkong ban bishar bniah ia ki kot ki sla jong ki kyrtong ba pan tiket Lok Sabha na Shillong bad na Tura Parliamentary constituency.
Kane ka komiti kaba khlieh da u Bah Presdident ka MPCC u Bah DD Lapang kan pynlong ia ka jingbishar bniah ia ki kot ki sla jong ki kyrtong jong ka Shillong bad ka Tura Parliamentary shwa ban phah sha ka AICC.
Nalor u Bah Lapang, kiwei ki dkhot ka komiti ki long Bah HDR Lyngdoh, Kong Ampareen Lyngdoh, Ka Deborah C Marak, Bah Charles Pyngrope, Bah Shitlang Pale, Bah PW Muktieh bad ka Kong Habigel War.
Hynrei ka khubor ka iathuh ba u Bah Pyngrope u lah ban nym wan sha kane ka jingialang namar ba u dei uwei na kiba pan tiket.
Ka thymmei khubor ka iathuh ba u MLA ka Mylliem Bah Ronnie V Lyngdoh u la dep phah ia ki kot ki sla sha ka party ban pan tiket.
Katkum ka thymmei khubor, ka komiti kan iapyrkhat halor kumno ban phah ia ki kyrtong kiba pan tiket na ka bynta ka MP Lok Sabha.
Ka thymmei khubor ka iathuh ba ka tiket na ka bynta u MP ba mynta u Bah Vincent H Pala ka lah ban kham jngan hadien ba la mih kyrteng sa u MLA ka Mylliem namar ba ki nongialam ki don kiba kwah ia u Bah Ronnie ruh.
Ka Election Committee kan pyndep ia ka kam jongka lashai shwa ban phah pat AICC ha kaba u president ka MPCC bad u Myntri Rangbah ki dei ki dkhot.